ഭോപ്പാല്‍: പശുവിനെ കൊന്നെന്ന് ആരോപിച്ച് ഒരു സംഘമാളുകള്‍ രണ്ട് ആദിവാസി യുവാക്കളെ മര്‍ദ്ദിച്ച് കൊലപ്പെടുത്തിയെന്ന് പൊലീസ്. മധ്യപ്രദേശിലെ സിയോണി ജില്ലയിലാണ് സംഭവം. സംഭവത്തില്‍ മറ്റൊരാള്‍ക്ക് പരിക്കേറ്റതായും പൊലീസ് അറിയിച്ചു.

20 പേരടങ്ങിയ സംഘമാണ് ആക്രമണം നടത്തിയത്. ക്രൂരമായി മര്‍ദനമേറ്റ ഇരുവരും ആശുപത്രിയിലേക്ക് പോകുംവഴിയാണ് മരിച്ചത്.

20 പേര്‍ക്കെതിരെയും കേസെടുത്തിട്ടുണ്ടെന്ന് പൊലീസ് അറിയിച്ചു. സിയോനി പൊലീസ് മേധാവിയും മറ്റു ഉദ്യോഗസ്ഥരും കൊലപ്പെട്ടവരുടെ വീട് സന്ദര്‍ശിച്ചു. പ്രതികള്‍ക്കെതിരെ കൊലപാതകത്തിന് കേസ് റജിസ്റ്റര്‍ ചെയ്തതായും ഇവര്‍ക്കായി തിരച്ചില്‍ നടത്തുന്നതായും പൊലീസ് പറഞ്ഞു.

കൊലപ്പെട്ടവരുടെ വീട്ടില്‍നിന്ന് 12 കിലോയോളം ഇറച്ചി കണ്ടെടുത്തു.

സംഭവത്തിന് പിന്നാലെ കോണ്‍ഗ്രസ് എംഎല്‍എ അര്‍ജുന്‍ സിംഗ് കക്കോഡിയയുടെ നേതൃത്വത്തില്‍ ജബല്‍പൂര്‍-നാഗ്പൂര്‍ ഹൈവേ ഉപരോധിച്ചു.