സ്വന്തം ലേഖകന്‍

തിരുവനന്തപുരം: തെരഞ്ഞെടുപ്പിലെ കനത്ത തോല്‍വി പാഠമാക്കി തിരുത്തല്‍ നടപടികളുമായി കോണ്‍ഗ്രസ്. ജംബോ കമ്മിറ്റികള്‍ പിരിച്ചുവിട്ട് കാര്യശേഷിയും കഴിവുമുള്ളവരെ മാത്രമുള്‍പ്പെടുത്തി പുന:സംഘടിപ്പിക്കാനാണ് ഹൈക്കമാന്‍ഡ് തീരുമാനം.

 

വൈസ് പ്രസിഡന്റുമാരും ജനറല്‍ സെക്രട്ടറിമാരും സെക്രട്ടറിമാരുമെല്ലാം ഉള്‍പ്പെടെ പരമാവധി 60 പേരെ മാത്രം ഉള്‍പ്പെടുത്തിയാല്‍ മതിയെന്നാണ് തീരുമാനം. കെ.പി.സി.സി പോഷകസംഘടനകളിലും ബൂത്ത്, മണ്ഡലം, ബ്ലോക്ക് തലങ്ങളിലും ഡി.സി.സികളിലും അഴിച്ചുപണിയുണ്ടാകും. ഗ്രൂപ്പ് അടിസ്ഥാനത്തിലുള്ള വീതം വയ്ക്കല്‍ അവസാനിപ്പിക്കാനാണ് തീരുമാനം. 

കാര്യശേഷിയുള്ളവര്‍ ഉണ്ടായിരുന്നിട്ടും ഗ്രൂപ്പ് അടിസ്ഥാനത്തില്‍ ഭാരവാഹികളെ നിശ്ചയിച്ചതിലൂടെ താഴെത്തട്ടില്‍ പ്രവര്‍ത്തകര്‍ അകന്നുപോയതാണ് തെരഞ്ഞെടുപ്പിലെ തോല്‍വിക്ക് കാരണമെന്നാണ് വിലയിരുത്തല്‍. ഗ്രൂപ്പുകളുടെ അതിപ്രസരവും ലോക്‌സഭാ തെരഞ്ഞെടുപ്പിലെ വിജയത്തിനു ശേഷമുണ്ടായ അമിത ആത്മവിശ്വാസവും സംഘടനാ ദൗര്‍ബല്യവുമാണ് കനത്ത തിരിച്ചടിക്കു കാരണമെന്ന് എ.ഐ.സി.സി ജനറല്‍ സെക്രട്ടറി താരിഖ് അന്‍വര്‍ ഹൈക്കമാന്‍ഡിന് റിപ്പോര്‍ട്ടുനല്‍കിയിരുന്നു. നേതൃതലമുള്‍പ്പെടെ സമൂല അഴിച്ചുപണി വേണമെന്നും താരിഖ് അന്‍വര്‍ ആവശ്യപ്പെട്ടിട്ടുണ്ട്. തദ്ദേശതെരഞ്ഞെടുപ്പിലേറ്റ തിരിച്ചടിക്കുശേഷം ഏഴ് ഡി.സി.സികളില്‍ നേതൃതലത്തിലടക്കം മാറ്റം നിര്‍ദ്ദേശിച്ചിട്ടും ഗ്രൂപ്പുകള്‍ അതിന് തടയിട്ടെന്നാണ് ഹൈക്കമാന്‍ഡ് വിലയിരുത്തല്‍.