ഇടുക്കി: കുമളിക്ക് സമീപം പതിനാറുകാരിയായ സ്‌കൂള്‍ വിദ്യാര്‍ഥിനി വീട്ടില്‍ പ്രസവിച്ചു. ഇന്ന് രാവിലെയാണ് സംഭവം. വീട്ടുകാര്‍ വിവരമറിയിച്ചതിന്റെ അടിസ്ഥാനത്തില്‍ പൊലിസ് സ്ഥലത്തെത്തി അമ്മയേയും കുഞ്ഞിനേയും ആശുപത്രിയിലെത്തിച്ചു. അമ്മയ്ക്കും കുഞ്ഞിനും മറ്റ് ആരോഗ്യപ്രശ്‌നങ്ങളില്ലെന്നാണ് ഡോക്ടര്‍മാര്‍ അറിയിച്ചത്. തുടര്‍ന്ന് പൊലീസ് പെണ്‍കുട്ടിയുടെ മൊഴി രേഖപ്പെടുത്തി.

മൊഴിയുടെ അടിസ്ഥാനത്തില്‍ സഹപാഠിക്കായി പൊലിസ് തെരച്ചില്‍ തുടങ്ങി. ഇരുവരും സ്‌നേഹത്തിലായിരുന്നെന്നാണ് പെണ്‍കുട്ടിയുടെ മൊഴി. പെണ്‍കുട്ടിയെ മറ്റാരെങ്കിലും പീഡിപ്പിച്ചിട്ടുണ്ടോയെന്നും പൊലിസ് അന്വേഷിച്ചു വരികയാണ്.

ഇന്നലെ വൈകീട്ട് മുതല്‍ കുട്ടിക്ക് ശാരീരികമായ അസ്വാസ്ഥ്യമുണ്ടെന്ന് പറഞ്ഞിരുന്നു. അതിനാല്‍ പെണ്‍കുട്ടി ഇന്ന് സ്‌കൂളില്‍ പോയിരുന്നില്ല. കുട്ടി ഗര്‍ഭിണിയാണെന്നുളള ഒരു സൂചന പോലും ലഭിച്ചിരുന്നില്ലെന്നും ബന്ധുക്കള്‍ പറഞ്ഞു.