പരീക്ഷയ്ക്ക് മെസ്സിയുടെ ജീവചരിത്രം എഴുതാന്‍ ആവശ്യപ്പെട്ടപ്പോള്‍ മെസിയെക്കുറിച്ച് ദീര്‍ഘമായി എഴുതിയെങ്കിലും നെയ്മര്‍ ഫാന്‍സുകാരന് കുറിപ്പിന്റെ അവസാനത്തില്‍ നെയ്മറിനെ പൊക്കിപ്പറയാതിരിക്കാന്‍ സാധിച്ചില്ല. മെസിയുടെ ജനനം മുതല്‍ ഖത്തര്‍ ലോകകപ്പ് നേട്ടം വരെ കുറിപ്പില്‍ എഴുതിപ്പിടിപ്പിച്ചിട്ടുണ്ട്. നാലാം ക്ലാസുകാരുടെ വാര്‍ഷിക പരീക്ഷയുടെ ചോദ്യപേപ്പറിലെ മെസിയുടെ ജീവ ചരിത്രം എഴുതാന്‍ ആവശ്യപ്പെട്ടപ്പോഴാണ് നെയ്മറിനെയും ഉള്‍പ്പെടുത്തിക്കൊണ്ട് വിദ്യാര്‍ഥി കുറിപ്പെഴുതിയത്. നെയ്മറിന്റെ ഉറ്റ സുഹൃത്താണ് മെസി...പക്ഷെ നെയ്മറിന്റെ ഏഴ് അയലത്ത് എത്തൂല എന്നും പറഞ്ഞാണ് കുറിപ്പ് അവസാനിപ്പിച്ചത്.

മെസ്സിയുടെ ജീവചരിത്രത്തിന് ഹിന്റുകള്‍ നല്‍കിയ ചോദ്യത്തിന് മെസ്സിയെക്കുറിച്ച് കൃത്യമായി എഴുതിയിട്ടുണ്ട്. എന്നാല്‍ ഉത്തരത്തിന്റെ അവസാന ഭാഗത്ത് താനൊരു നെയ്മര്‍ ഫാനാണെന്നും മെസ്സി പോരെന്നും കുറിച്ചിട്ടുണ്ട്. പരീക്ഷാ പേപ്പറുകള്‍ സാമൂഹ്യമാധ്യമങ്ങളില്‍ പ്രത്യക്ഷപ്പെട്ടതോടെ നിരവധി പേരാണ് ഷെയര്‍ ചെയ്തത്. രസകരമായ കമന്റുകളും ഒപ്പമുണ്ട്.

മറ്റൊരു വിദ്യാര്‍ഥിയുടെ മറുപടി കൂടി സോഷ്യല്‍ മീഡിയയില്‍ വൈറലാണിപ്പോള്‍. നിലമ്പൂര്‍ തണ്ണിക്കടവ് എ യു പി സ്‌കൂളിലെ 4ാം ക്ലാസ്സിലെ ഷാനിദ് കെ യാണ് താന്‍ നെയ്മര്‍ ഫാനാണെന്നും അതു കൊണ്ടുതന്നെ ചോദ്യത്തിന് ഉത്തരം എഴുതാന്‍ കഴിയില്ലെന്നും പരീക്ഷാപേപ്പറില്‍ എഴുതി വെച്ചത്. പരീക്ഷാ പേപ്പര്‍ സാമൂഹ്യമാധ്യമങ്ങളിലൂടെ വൈറലാവുകയായിരുന്നു.

രാജേഷ് സി വള്ളിക്കോട് എന്ന അധ്യാപകനാണ് ഫേസ്ബുക്കില്‍ കുറിപ്പുകള്‍ പങ്കുവെച്ചത്. കുട്ടികളുടെ അഭിരുചിക്കനുസരിച്ചുള്ള ചോദ്യങ്ങളായിരുന്നു പരീക്ഷയ്ക്ക് നല്‍കിയത്. നാലാം ക്ലാസുകാരനായ ഷാനിദ് താന്‍ നെയ്മര്‍ ഫാനാണെന്നും അതിനാല്‍ മെസ്സിയെക്കുറിച്ച് എഴുതാന്‍ ആവില്ലെന്നും പരീക്ഷാ പേപ്പറില്‍ എഴുതി വെക്കുകയായിരുന്നു.