സ്വന്തം ലേഖകൻ
കൊച്ചി
പുറംകടലില്‍നിന്ന് 1,526 കോടി രൂപ വിലവരുന്ന ഹെറോയിൻ പിടികൂടിയ കേസില്‍ പാകിസ്താൻ ബന്ധം സ്ഥിരീകരിച്ച് ഡയരക്ടറേറ്റ് ഓഫ് റവന്യു ഇന്റലിജൻസ് (ഡി.ആർ.ഐ). പ്രതികളായ നാലുപേര്‍ക്ക് ലഹരിക്കടത്തില്‍ പാക് ശൃംഖലയുമായി ബന്ധമുണ്ടെന്ന് തോപ്പുംപടി കോടതിയിൽ ഡി.ആർ.ഐ നൽകിയ റിമാൻഡ് റിപ്പോർട്ടിൽ വ്യക്തമാക്കുന്നു.
പാകിസ്താനിലെ പഞ്ചസാര മില്ലിന്റെ മേല്‍വിലാസത്തിലാണ് ഹെറോയിന്‍ ഇന്ത്യയിലേക്ക് കൊണ്ടുവന്നത്. 'ഹബീബ് ഷുഗർ മിൽസ്, വൈറ്റ് റിഫൈൻഡ് ഷുഗർ, പ്രോഡക്ട് ഓഫ് പാകിസ്താൻ' എന്നാണ് പാക്കറ്റുകളിൽ പതിപ്പിച്ചിരുന്നത്. പാകിസ്ഥാനിൽനിന്ന് കപ്പലിൽ കൊണ്ടുവന്ന ഹെറോയിൻ അഗത്തി പുറങ്കടലിൽ മത്സ്യബന്ധന ബോട്ടുകളിലേക്ക് മാറ്റിയെന്നാണ് ഡി.ആർ.ഐ കണ്ടെത്തിയിരിക്കുന്നത്.
വിഴിഞ്ഞം സ്വദേശി ഫ്രാന്‍സിസ്, പൊഴിയൂര്‍ സ്വദേശി സുജന്‍ എന്നീ മലയാളികളും പ്രതിപ്പട്ടികയിലുണ്ട്. ഇവർക്ക് ഏതെങ്കിലും തരത്തിലുള്ള പാക് ബന്ധമുണ്ടോയെന്നും അന്വേഷിക്കുന്നുണ്ട്. സംഭവത്തില്‍ എന്‍.ഐ.എ പ്രാഥമിക അന്വേഷണം ആരംഭിച്ചു. ലഹരിക്കൊപ്പം ആയുധങ്ങൾ കടത്തുന്നുണ്ടോ എന്നും അന്വേഷിക്കും.

കൊച്ചിയുടെ പുറംകടലില്‍ ലക്ഷദ്വീപിലെ അഗത്തിക്കു സമീപമാണ് കഴിഞ്ഞ ദിവസം വൻ ലഹരിവേട്ട നടന്നത്. രാജ്യാന്തര വിപണിയില്‍ 1,526 കോടി രൂപ വിലവരുന്ന 218 കിലോ ഹെറോയിനാണ് ഡി.ആര്‍.ഐയും തീരസംരക്ഷണ സേനയും സംയുക്തമായി നടത്തിയ പരിശോധനയിൽ പിടികൂടിയത്. രണ്ട് മത്സ്യബന്ധന ബോട്ടുകളിൽ 218 പായ്ക്കറ്റുകളിലായി അറകളിൽ സൂക്ഷിച്ച നിലയിലായിരുന്നു ഹെറോയിൻ കണ്ടെത്തിയത്. ബോട്ടുകളിലുണ്ടായിരുന്ന തമിഴ്നാട് സ്വദേശികളും മലയാളികളുമടക്കം 20 പേരെ കസ്റ്റഡിയിലെടുത്തിരുന്നു. അ‍ഡ്വ. ബി.എ ആളൂരാണ് പ്രതികൾക്കു വേണ്ടി കോടതിയിൽ ഹാജരായത്.