ലണ്ടന്‍: യൂറോപ്യന്‍, ദക്ഷിണ അമേരിക്കന്‍ ഭൂഖണ്ഡങ്ങളിലെ ഫുട്‌ബോള്‍ ചാമ്പ്യന്മാര്‍ മാറ്റുരക്കുന്ന ഫൈനലിസിമ കിരീടം അര്‍ജന്റീനക്ക്. യൂറോ കപ്പ് ചാമ്പ്യന്മാരായ ഇറ്റലിയെ എതിരില്ലാത്ത മൂന്നു ഗോളിന് കീഴടക്കിയാണ് ലയണല്‍ മെസിയും സംഘവും ഒരു വര്‍ഷത്തിനിടെ രണ്ടാം കിരീടം സ്വന്തമാക്കുന്നത്.

കോപ ജേതാക്കള്‍ക്കു വേണ്ടി ലൗത്താറോ മാര്‍ട്ടിനസ്, എയ്ഞ്ചല്‍ ഡിമരിയ, പൗളോ ഡിബാല എന്നിവര്‍ ഗോളുകള്‍ നേടി. ലൗത്താറോയുടെയും ഡിബാലയുടെയും ഗോളുകള്‍ക്ക് മെസിയും ഡിമരിയക്ക് ലൗത്താറോയും വഴിയൊരുക്കി.

മൂന്നു പതിറ്റാണ്ടിനു ശേഷം പുനരാരംഭിച്ച വന്‍കരാ ജേതാക്കള്‍ തമ്മിലുള്ള സൂപ്പര്‍ പോരാട്ടത്തിന് സൂപ്പര്‍ താരങ്ങളടങ്ങുന്ന മികച്ച നിരകളാണ് അണിനിരന്നത്.