കൊച്ചി
സ്വകാര്യ ബസുകളും ഓട്ടോറിക്ഷകളും ഹോൺ മുഴക്കിയും മറ്റു വാഹനങ്ങളെ ഓവർടേക്ക് ചെയ്തും അപകടം സൃഷ്ടിച്ച് ഓടുന്നത് നിയന്ത്രിക്കാൻ ഹൈക്കോടതിയുടെ നിർദേശം. ഇടതുവശത്തുകൂടി മാത്രമാണ് ബസുകളടക്കമുള്ള വാഹനങ്ങൾ ഓടിക്കേണ്ടതെന്നും ഇതിനായി സിറ്റി പൊലിസ് കമ്മിഷണറും ആർ.ടി.എ അധികൃതരും ഉത്തരവിറക്കണമെന്നും ഹൈക്കോടതി നിർദേശിച്ചു.
കൊച്ചി നഗരത്തിലെ റോഡുകൾക്ക് വീതി കുറവായതിനാൽ ഓട്ടോകളുടെ എണ്ണം നിയന്ത്രിക്കണം. എണ്ണം കൂടിയാൽ നഗരത്തിലെ റോഡുകൾക്ക് താങ്ങാൻ കഴിയില്ലെന്നും ജസ്റ്റിസ് അമിത് റാവൽ വ്യക്തമാക്കി. കൊച്ചി നഗരത്തിൽ സർവിസ് നടത്താൻ പെർമിറ്റ് നിഷേധിച്ച ആർ.ടി.എയുടെ നടപടിക്കെതിരേ പെരുമ്പാവൂർ സ്വദേശി അബൂബക്കർ ഉൾപ്പെടെ 18 ഓട്ടോ ഉടമകൾ നൽകിയ ഹരജിയിലാണ് സിംഗിൾ ബെഞ്ചിന്റെ ഉത്തരവ്. കൊച്ചിയിൽ മാത്രമല്ല, മറ്റു ജില്ലകളിലും ട്രാഫിക് നിയമങ്ങൾ പാലിക്കാതെയാണ് മിക്ക ഓട്ടോറിക്ഷകളും സർവിസ് നടത്തുന്നത്.

ഓട്ടോഡ്രൈവർമാരുടെ സൗകര്യമനുസരിച്ചാണ് സർവിസ് നടത്തുന്നത്. റോഡിൽ നിറുത്തി ആളെയെടുത്തും ആളുകളെ അപകടകരമായി കുത്തിനിറച്ചുമൊക്കെയാണ് ഓട്ടോയോടുന്നതെന്നും കോടതി പറഞ്ഞു. സ്വകാര്യ ബസുകൾക്കും ഓട്ടോകൾക്കും സ്പീഡ് ലിമിറ്റ് കർശനമാക്കണം. സ്വകാര്യ ബസുകളുടെ അമിതവേഗം തടയാൻ സ്പീഡ് ഗവർണർ നിർബന്ധമാക്കണമെന്നും ഉത്തരവിൽ പറയുന്നു.