കോഴിക്കോട്: പ്രസിദ്ധ ചിത്രകാരന്‍ പി. ശരത് ചന്ദ്രന്‍ നിര്യാതനായി. 79 വയസായിരുന്നു. എരഞ്ഞിപ്പാലത്തെ വീട്ടില്‍ ഇന്ന് രാവിലെയാണ് അന്ത്യം. സംസ്‌കാരം വൈകിട്ട് നാലിന് മാവൂര്‍ റോഡ് ശ്മശാനത്തില്‍ നടക്കും.

അന്താരാഷ്ട്ര ഇടങ്ങളില്‍ അറിയപ്പെടുന്ന മലയാളിചിത്രകാരനാണ് ശരത്ചന്ദ്രന്‍. ജലച്ചായം, ഓയില്‍ കളര്‍, അക്രിലിക്, ചാര്‍ക്കോള്‍ എന്നീ എല്ലാ മാധ്യമങ്ങളിലും ഒരേ പോലെ പ്രാഗല്‍ഭ്യം തെളിയിച്ച ചിത്രകാരനാണ് അദ്ദേഹം. റിച്ചാര്‍ഡ് ആറ്റന്‍ ബറോയുടെ ഗാന്ധി സിനിമയുടെ പരസ്യ ചിത്രകാരനായിരുന്നു. നിരവധി പരസ്യങ്ങള്‍ക്കായി ചിത്രങ്ങളും ഡിസൈനും നിര്‍വ്വഹിച്ചിട്ടുണ്ട്.

തലശ്ശേരി കേരള സ്‌കൂള്‍ ഓഫ് ആര്‍ട്ട്‌സിലെ സി.വി.ബാലന്‍ നായര്‍ക്കു കീഴിലാണ് ശരത് ചന്ദ്രന്‍ ചിത്രകലാഭ്യസനം നടത്തിയത്. 1964 ല്‍ ബോംബെയില്‍ എത്തിയ അദ്ദേഹം ടുബാക്കോ കമ്പനിയില്‍ ആര്‍ട്ട് ഡയറക്ടറായി. പിന്നീട് ഓര്‍ബിറ്റ് എന്ന പേരില്‍ പരസ്യ ഏജന്‍സി തുടങ്ങി. പനാമ സിഗരറ്റിന്റെ പാക്കറ്റുകള്‍ ആകര്‍ഷകമായി രൂപ കല്‍പ്പന ചെയ്തത് അദ്ദേഹമാണ്. പുകവലി ആരോഗ്യത്തിന് ഹാനികരം എന്ന മുന്നറിയിപ്പിന്റെ അക്ഷരങ്ങളുടെ വലിപ്പം കൂട്ടിയതും താനാണെന്ന് ശരത് ചന്ദ്രന്‍ പറഞ്ഞിരുന്നു.

നിരവധി കമ്പനികള്‍ക്കായി അദ്ദേഹം പരസ്യ ഡിസൈനുകള്‍ തയാറാക്കി. യു.എസ്.എസ്.ആര്‍, മിഡില്‍ ഈസ്റ്റ്, യു.എസ്.എ, എതോപ്യ തുടങ്ങി രാജ്യങ്ങളിലേക്ക് കയറ്റി അയച്ചിരുന്ന ഭൂരിഭാഗം സിഗരറ്റ് കമ്പനികള്‍ക്കു വേണ്ടിയും അദ്ദേഹം ഡിസൈന്‍ ചെയ്തിരുന്നു.