ജലീൽ അരൂക്കുറ്റി
കൊച്ചി
തൃക്കാക്കര ഉപതെരഞ്ഞെടുപ്പ് നൽകിയ ഊർജ്ജത്തിൽ തിളങ്ങി നിൽക്കുന്ന യു.ഡി.എഫിന് സ്വപ്‌ന സുരേഷ് പുറത്തുവിട്ട വിവരങ്ങൾ സർക്കാരിനെതിരേ വീണ്ടും ആഞ്ഞടിക്കാൻ അവസരം സമ്മാനിച്ചു. നേരത്തെ പ്രതിപക്ഷം ഉന്നയിച്ച ആരോപണങ്ങൾ ശരിവച്ചുകൊണ്ടുള്ള സ്വപ്‌നയുടെ വെളിപ്പെടുത്തൽ മുഖ്യമന്ത്രിക്കും സി.പി.എമ്മിനും രാഷ്ട്രീയമായ വെല്ലുവിളിയാണ് ഉയർത്തുന്നത്. നിയമസഭാ തെരഞ്ഞെടുപ്പിൽ പോലും സ്വപ്‌നയും സ്വർണകള്ളക്കടത്തും ഏറെ ചർച്ചയായെങ്കിലും, മുഖ്യമന്ത്രി പിണറായി വിജയനും കുടുംബത്തിനും എതിരെ ഉയർന്ന ആരോപണങ്ങളെ പ്രതിരോധിക്കാൻ സി.പിഎമ്മിന് കഴിഞ്ഞിരുന്നു. എന്നാൽ കേസിൽ പ്രതിയാക്കപ്പെട്ട സ്വപ്‌ന സുരേഷിന്റെ വെളിപ്പെടുത്തൽ മുഖ്യമന്ത്രിക്കും കുടുംബത്തിനും നേരേ ഉയർന്നതാണ് വെട്ടിലാക്കുന്നത്. നേരത്തെ സ്വർണ കള്ളക്കടത്ത് കേസിൽ മുഖ്യമന്ത്രിക്കും മന്ത്രിമാർക്കും നേരെ ആക്ഷേപങ്ങൾ ഉയർന്നിരുന്നെങ്കിലും മുഖ്യമന്ത്രിയുടെ കുടുംബത്തിന് നേരെ സ്വപ്‌ന ഒന്നും പറഞ്ഞിരുന്നില്ല. ഇപ്പോൾ മുഖ്യമന്ത്രിയുടെ ഭാര്യയുടെയും മകളുടെയും പേര് ആദ്യമായി പരസ്യമായി വ്യക്തമാക്കുകയായിരുന്നു. എന്നാൽ കേസിൽ മുഖ്യമന്ത്രിയുടെ ഭാര്യ കമലയുടെയും മകൾ വീണയുടെയും പങ്ക് എന്താണെന്ന് വ്യക്തമായി പറഞ്ഞിട്ടുമില്ല. ക്ലിഫ് ഹൗസിനെ പ്രതിസ്ഥാനത്തേക്ക് കൊണ്ടുവരുമ്പോൾ മുഖ്യമന്ത്രിയുടെ കുടുംബം കൂടി സംശയത്തിന്റെ മുൾമുനയിലായിരിക്കുകയാണ്. സ്വപ്‌നയുടെ വെളിപ്പെടുത്തലുകളുടെ പശ്ചാത്തലത്തിൽ മുഖ്യമന്ത്രിയും സി.പി.എം നേതാക്കളും മൗനം അവലംബിക്കുന്ന സാഹചര്യത്തെ കൂടുതൽ ഫലപ്രദമാക്കി മാറ്റാനാണ് കോൺഗ്രസും യു.ഡി.എഫും ശ്രമിക്കുന്നത്. ഒപ്പം സ്വർണ കള്ളക്കടത്ത് കേസിലും കള്ളപ്പണ കേസിലും കേന്ദ്രം ഭരിക്കുന്ന ബി.ജെ.പിയും സി.പി.എമ്മും തമ്മിൽ ഒത്തുകളിക്കുകയാണെന്ന യു.ഡി.എഫിന്റെ ആരോപണവും ശക്തിപ്പെടുകയാണ്.