ന്യൂഡല്‍ഹി: ബി.ജെ.പി നേതാക്കള്‍ നടത്തിയ പ്രവാചക നിന്ദാ പരാമര്‍ശത്തിനെതിരെ ലോകമെങ്ങും പ്രതിഷേധം ശക്തമാകുന്നതിനിടെ ഇറാന്‍ വിദേശകാര്യ മന്ത്രി ഹുസൈന്‍ ആമിര്‍ അബ്ദുല്ലാഹിയാന്‍ ഇന്ത്യയില്‍. ത്രിദിന സന്ദര്‍ശനത്തിനായി ഇന്ത്യയിലെത്തിയ ഇറാന്‍ വിദേശകാര്യ മന്ത്രി പ്രധാനമന്ത്രി നരേന്ദ്ര മോദിയുമായും വിദേശകാര്യ മന്ത്രി എസ് ജയശങ്കുറമായും കൂടിക്കാഴ്ച നടത്തി. പ്രവാചകനിന്ദ ആഗോളതലത്തില്‍ വിവാദമായതിന് ശേഷം ഇന്ത്യയില്‍ എത്തുന്ന ആദ്യ മുസ്‌ലിം ഭൂരിപക്ഷ രാജ്യത്തിന്റെ പ്രതിനിധിയാണ് ഹുസൈന്‍ അമീര്‍ അബ്ദുല്ലാഹിയാന്‍. ഇന്ത്യ ഇറാന്‍ നയതന്ത്ര ബന്ധം ശക്തിപ്പെടുത്തുക എന്ന ലക്ഷ്യത്തോടെയായിരുന്നു അബ്ദുല്ലാഹിയാന്റെ ഇന്ത്യ സന്ദര്‍ശനം. പ്രധാനമന്ത്രി നരേന്ദ്ര മോദിയുമായി നടന്ന കൂടിക്കാഴ്ചയില്‍ അബ്ദുല്ലാഹിയാന്‍ സമാന വിഷയം ഉന്നയിച്ചതായാണ് സൂചന.

ബിജെപി നേതാക്കളായിരുന്ന നൂപുര്‍ ശര്‍മ, ജിന്‍ഡാല്‍ എന്നിവര്‍ നടത്തിയ പ്രവാചകനിന്ദ ഇറാന്‍ അടക്കമുള്ള ലോകരാഷ്ട്രങ്ങള്‍ അപലപിച്ചിരുന്നു ഇന്ത്യന്‍ പ്രതിനിധികളെ വിളിച്ചുവരുത്തിയാണ് പലരാജ്യങ്ങളും പ്രതിഷേധം അറിയിച്ചത്. വിവാദ പ്രസ്താവനയുടെ പശ്ചാത്തലത്തില്‍ പല അറബ് രാഷ്ട്രങ്ങളുമായുള്ള രാജ്യത്തിന്റെ നയതന്ത്ര ബന്ധങ്ങളില്‍ വിള്ളല്‍ വീഴുമോ എന്ന ആശങ്കയും കേന്ദ്രസര്‍ക്കാറിനുണ്ട്. വിദേശനിക്ഷേപം ഉള്‍പ്പെടെയുള്ള സാമ്പത്തികരംഗത്തും പ്രവാചകനെ നിന്ദിച്ചു കൊണ്ടുള്ള ബിജെപി നേതാക്കളുടെ പ്രസ്താവന തിരിച്ചടിയായേക്കും.