ഈഴവനെന്നൊക്കെ പേരിടുമോ

കൊച്ചി: ജാതി പരാമര്‍ശത്തില്‍ കുടുങ്ങി മുകേഷും നവ്യ നായരും. സ്വകാര്യ ചാനല്‍ നടത്തിയ റിയാലിറ്റി ഷോയ്ക്കിടെ മത്സരാര്‍ത്ഥിയുമായുള്ള സംഭാഷണം സോഷ്യല്‍ മീഡിയയില്‍ ചര്‍ച്ചയായിരിക്കുകയാണ്. ഓജസ് ഈഴവന്‍ എന്ന വിദ്യാര്‍ത്ഥിയുടെ പേരിലെ 'ഈഴവന്‍' ആണ് ചൂടുപിടിച്ച ചര്‍ച്ചക്കാധാരം.

'എന്റെ പേര് ഓജസ് ഈഴവന്‍, എന്‍എസ്എസ് കോളജ് ഒറ്റപ്പാലം, തേര്‍ഡ് ഇയര്‍ വിദ്യാര്‍ത്ഥിയാണ്' എന്നായിരുന്നു മത്സരാര്‍ത്ഥി പറഞ്ഞത്. 'ഓജസ് ഈഴവന്‍, അങ്ങനെ പേരിടുമോ' എന്നായി മുകേഷിന്റെ ചോദ്യം.

ഈഴവനെന്നൊക്കെ പേരിടുമോ

'പാര്‍വതി നായര്‍, പാര്‍വതി നമ്പൂതിരി എന്നൊക്കെ ഇടാമെങ്കില്‍ ഓജസ് ഈഴവന്‍ എന്നുമിടാം' എന്നാണ് ഓജസ് മറുപടി നല്‍കിയത്. 'അങ്ങനെ ഇടാം എന്നാലും നമ്മള്‍ അങ്ങനെ കേട്ടിട്ടില്ല, അതുകൊണ്ട് ചോദിച്ചതാണ്' മുകേഷ് പ്രതികരിച്ചു. പിന്നാലെ സ്വന്തമായി ഇട്ടതാണല്ലേ എന്ന് നവ്യയുടെ കമന്റും.

ഓജസിനെ അഭിനന്ദിച്ചും മുകേഷിനെയും നവ്യയെയും വിമര്‍ശിച്ചും നിരവധി പേരാണ് എത്തുന്നത്. സ്വന്തമായി ഇട്ടതാണല്ലെ എന്ന നവ്യയുടെ പ്രതികരണമാണ് കൂടുതല്‍ വിമര്‍ശനത്തിനിരയായിരിക്കുന്നത്.