ലഖ്‌നൗ: പ്രവാചക നിന്ദ നടത്തിയ ബി.ജെ.പി നേതാക്കളെ അറസ്റ്റ് ചെയ്യണമെന്ന് ആവശ്യപ്പെട്ട് പ്രതിഷേധിച്ചവര്‍ക്കെതിരെ കടുത്ത നടപടിയുമായി ഉത്തര്‍പ്രദേശ് പൊലിസ്. ആറ് ജില്ലകളില്‍ നിന്നായി 200 ലധികം പേരെയാണ് പൊലിസ് അറസ്റ്റ് ചെയ്തത്.

68 പേരെ പ്രയാഗ്‌രാജില്‍ നിന്നും 50 പേരെ ഹത്രാസില്‍ നിന്നും സഹാറന്‍പൂരില്‍ നിന്ന് 48 പേരെയുമാണ് അറസ്റ്റ് ചെയ്തത്. അംബേദ്കര്‍നഗര്‍ -28 മൊറാദാബാദ് -25, ഫിറോസാബാദില്‍ നിന്ന് എട്ടും പേരെയും പൊലിസ് അറസ്റ്റ് ചെയ്തു.

ആറ് ജില്ലകളില്‍ നിന്ന് 227 പേരെ അറസ്റ്റ് ചെയ്തുവെന്നാണ് ഇന്ന് രാവിലെ വരെയുള്ള കണക്ക്. കൂടുതല്‍ അറസ്റ്റുണ്ടാകുമെന്ന് പൊലിസ് അറിയിച്ചു. സംഘര്‍ഷത്തിന്റെയും പ്രതിഷേധത്തിന്റെയും വീഡിയോ പരിശോധിച്ചുവരികയാണ്. പ്രതികള്‍ക്കെതിരെ ശക്തമായ നടപടിയെടുക്കുമെന്നും പ്രതിഷേധക്കാര്‍ ശാന്തരാകണമെന്നും പൊലിസ് ഓഫീസര്‍ പ്രശാന്ത് കുമാര്‍ ആവശ്യപ്പെട്ടു.

സാമൂഹിക വിരുദ്ധര്‍ക്കെതിരെ കര്‍ശന നടപടിയെടുക്കാന്‍ ഉദ്യോഗസ്ഥര്‍ക്ക് സ്വാതന്ത്ര്യവും വ്യക്തമായ നിര്‍ദേശവും നല്‍കിയിട്ടുണ്ടെന്ന് മുഖ്യമന്ത്രി യോഗി ആദിത്യനാഥിന്റെ ഓഫീസ് അറിയിച്ചു.

ബിജെപി ദേശീയ വക്താവായിരുന്ന നുപുര്‍ ശര്‍മ, ഡല്‍ഹി വക്താവ് നവീന്‍ കുമാര്‍ ജിന്‍ഡാല്‍ എന്നിവരുടെ പ്രതികരണമാണ് വിവാദമായത്. ആഗോള തലത്തില്‍ പ്രതിഷേധം ഉയര്‍ന്നതോടെ ഇവര്‍ക്കെതിരെ പൊലിസ് കേസെടുക്കുകയും പാര്‍ട്ടിയില്‍ നിന്ന് ബിജെപി സസ്‌പെന്റ് ചെയ്യുകയുമുണ്ടായി. എന്നാല്‍ രണ്ടാഴ്ചയായിട്ടും പ്രതികളെ അറസ്റ്റ് ചെയ്യാന്‍ തയ്യാറാകാത്തത് സര്‍ക്കാരിന്റെ ഇരട്ട നയമാണെന്ന് പ്രതിഷേധക്കാര്‍ പറയുന്നു.