റാഞ്ചി
ജാർഖണ്ഡിൽ പ്രവാചകനിന്ദയ്‌ക്കെതിരെ പ്രതിഷേധിച്ചവർക്കുനേരേ പൊലിസ് വെടിവച്ചു. 16 വയസുകാരനായ മുദ്ദസിർ ഉൾപ്പെടെ രണ്ടു പേർ കൊല്ലപ്പെട്ടു. സാഹിൽ അൻസാരി (22) ആണ് കൊല്ലപ്പെട്ട രണ്ടാമത്തെയാൾ. 22 പേർക്ക് പരുക്കേറ്റു. ഇതിൽ 10 പേർ പൊലിസുകാരാണ്. പരുക്കേറ്റ മൂന്നു പേരുടെ ഗുരുതരമാണ്. സംഘർഷത്തെ തുടർന്ന് ജാർഖണ്ഡിന്റെ വിവിധ ഭാഗങ്ങളിൽ കർഫ്യൂ ഏർപ്പെടുത്തി.
പ്രവാചകനെ നിന്ദിച്ച മുൻ ബി.ജെ.പി വക്താവ് നൂപുർ ശർമയെ അറസ്റ്റ് ചെയ്യണമെന്നാവശ്യപ്പെട്ടായിരുന്നു പ്രതിഷേധം.
റാഞ്ചി മെയിൻ റോഡിലെത്തിയ പ്രക്ഷോഭകരെ പിരിച്ചുവിടാൻ പൊലിസ് ആകാശത്തേക്ക് വെടിവയ്ക്കുകയും ലാത്തിച്ചാർജ് നടത്തുകയും ചെയ്തു. തുടർന്ന് കല്ലേറുണ്ടായതോടെയാണ് പൊലിസ് വെടിവച്ചത്.

സ്ഥലത്ത് കനത്ത പൊലിസ് സുരക്ഷ ഏർപ്പെടുത്തുകയും കടകൾ അടയ്ക്കുകയും ചെയ്തിരുന്നു. സ്ഥിതി നിയന്ത്രണ വിധേയമാണെന്ന് സിറ്റി പൊലിസ് മേധാവി അൻഷുമാൻ കുമാർ പറഞ്ഞു. സംഘർഷ ബാധിത പ്രദേശത്ത് നിയന്ത്രണങ്ങളും ഇന്റർനെറ്റ് തടഞ്ഞിട്ടുമുണ്ട്. ജനങ്ങളോട് സമാധാനം പാലിക്കാനും പരിഭ്രാന്തരാകരുതെന്നും സമാധാനവും സൗഹാർദവും തുടരണമെന്നും ജാർഖണ്ഡ് മുഖ്യമന്ത്രി ഹേമന്ത് സോറൻ അഭ്യർഥിച്ചു.