ന്യൂയോര്‍ക്ക്: യു.എസില്‍ ഇന്ത്യന്‍ പെണ്‍കുട്ടി ദുരൂഹസാഹചര്യത്തില്‍ മരിച്ച സംഭവത്തില്‍ രണ്ടാനമ്മ അറസ്റ്റില്‍. ഒന്‍പതു വയസുകാരിയായ അഷ്ദീപ് കൗറിനെയാണ് ന്യൂയോര്‍ക്കിലെ ക്വീന്‍സിലുള്ള അപ്പാര്‍ട്‌മെന്റിലെ കുളിമുറിയില്‍ മരിച്ചനിലയില്‍ കണ്ടെത്തിയത്.
അഷ്ദീപിന്റെ രണ്ടാനമ്മ സാംദി പര്‍ദാസാണ് അറസ്റ്റിലായത്. പൊലിസ് അന്വേഷണത്തില്‍ സാംദി പര്‍ദാസ് കുട്ടിയെ കൊലപ്പെടുത്തിയതാണെന്ന് കണ്ടത്തെുകയായിരുന്നു. ഇവര്‍ക്കെതിരേ കൊലപാതകക്കുറ്റത്തിനു കേസെടുത്തു. സംഭവത്തിനു പിന്നാലെ ഒളിവില്‍ പോയ സാംദിയെ മണിക്കൂറുകള്‍ നീണ്ട തിരച്ചിലിനൊടുവിലാണ് പിടികൂടിയത്.
അഷ്ദീപിനെയും കൂട്ടി സാംദി കുളിമുറിയിലേക്കു പോകുന്നതു കണ്ടതായി ഇവരുടെ അപ്പാര്‍ട്‌മെന്റിലെ താമസക്കാരിലൊരാള്‍ പൊലിസിനോട് പറഞ്ഞു. എന്നാല്‍ കുളിമുറിയില്‍ നിന്ന് സാംദി മാത്രം പുറത്തുവരികയും അഷ്ദീപ് കുളിക്കുകയാണെന്ന് പറഞ്ഞ് പുറത്തുപോവുകയും ചെയ്യുകയായിരുന്നു. ഏറെ നേരം കഴിഞ്ഞിട്ടും പെണ്‍കുട്ടി പുറത്തു വരുന്നത് കാണാത്തതിനെ തുടര്‍ന്ന് കുളിമുറിയില്‍ നോക്കിയപ്പോഴാണ് മരിച്ചനിലയില്‍ കണ്ടെത്തിയത്.
മൂന്നുമാസം മുന്‍പാണ് അഷ്ദീപ് ഇന്ത്യയില്‍ നിന്നു ന്യൂയോര്‍ക്കില്‍ പിതാവ് സുഖ്ജിന്ദര്‍ സിങിന്റെ അടുത്തെത്തിയത്. അഷ്ദീപിന്റെ അമ്മയുമായി വേര്‍പിരിഞ്ഞ ശേഷം സുഖ്ജിന്ദര്‍ സാംദിയെ വിവാഹം കഴിക്കുകയായിരുന്നു.