ജിദ്ദ: സമസ്ത കേരള ഇസ്‌ലാം മത വിദ്യാഭ്യാസ ബോർഡ് നടത്തിയ പൊതു പരീക്ഷയിൽ കാടാമ്പുഴ റൈഞ്ചിലെ മൂലാഞ്ചോല വെട്ടിങ്ങാപുറം ദാറുൽ ഇസ്‌ലാം സെക്കന്ററി മദ്രസയിൽ നിന്നും 5,7,10 ക്ലാസുകളിൽ നിന്നും ഉന്നത വിജയം നേടിയ വിദ്യാർത്ഥികളെ ഗൾഫ് കമ്മിറ്റിയുടെ ആഭിമുഖ്യത്തിൽ അഭിനന്ദിച്ചു. മദ്രസ കമ്മിറ്റി ഭാരവാഹികളും ഗൾഫ് കമ്മിറ്റി പ്രതിനിധികളും ചേർന്ന് വിദ്യാർത്ഥികൾക്ക് മെമെന്റോ വിതരണം ചെയ്തു.

മദ്രസ സ്വദർ മുഅല്ലിം അബ്ദുന്നാസർ അൻവരി അധ്യക്ഷത വഹിച്ചു. വിദ്യാർത്ഥികളെ പ്രോത്സാഹിപ്പിക്കുന്നതിലും മദ്രസയുടെ പ്രവർത്തനനത്തിന് വേണ്ട സാമ്പത്തിക സഹായം നൽകുന്നതിലും ദാറുൽ ഇസ്‌ലാം മദ്രസ ഗൾഫ് കമ്മിറ്റി ഭാരവാഹികളുടെ പ്രവർത്തനം ശ്ലാഘനീയമാണെന്ന് അദ്ദേഹം പറഞ്ഞു. ഹംസ ചോഴി മഠത്തിൽ, മുഹമ്മദ്‌ കല്ലിങ്ങൽ എന്നിവർ ആശംസ നേർന്ന് സംസാരിച്ചു.

ഗൾഫ് കമ്മിറ്റി ഭാരവാഹികളായ അമീർ കൊരട്ടിയൻ സ്വാഗതവും വി. പി കുഞ്ഞിമോൻ നന്ദിയും പറഞ്ഞു.