തിരുവനന്തപുരം: മാംഗോ മൊബൈല്‍ ഉദ്ഘാടനം ചെയ്യാമെന്ന് മുഖ്യമന്ത്രി സമ്മതിച്ചെന്നും ഉദ്ഘാടനത്തിന് മുമ്പ് മാംഗോ മൊബൈല്‍ ഉടമ അറസ്റ്റിലായെന്നുമുള്ള പിടി തോമസ് എംഎല്‍എയുടെ ആരോപണത്തിനെതിരെ മുഖ്യമന്ത്രി പിണറായി വിജയന്‍. പ്രതിപക്ഷം സഭയില്‍ അടിസ്ഥാനരഹിതമായ കാര്യങ്ങളാണ് പറയുന്നതെന്ന് മുഖ്യമന്ത്രി വ്യക്തമാക്കി

മാംഗോ ഫോണ്‍ ഉദ്ഘാടനം ചെയ്യാമെന്ന് പറഞ്ഞത് താനല്ല. തട്ടിപ്പുകാരുടെ സ്വാധീനത്തില്‍ നില്‍ക്കുന്നത് താനല്ല. മുട്ടില്‍ മരം കൊള്ളക്കാരുമായി തനിക്ക് ബന്ധമുണ്ടെന്ന് സ്ഥാപിക്കാനാണ് ശ്രമം. മൊബൈല്‍ ഉദ്ഘാടനം ചെയ്യാമെന്ന് പറഞ്ഞ മുഖ്യമന്ത്രി മറ്റൊരാളാണ്. അത് ആരാണെന്ന് തന്നെക്കൊണ്ട് പറയിപ്പിക്കുന്നതില്‍ പി ടി തോമസിന് സന്തോഷമുണ്ടാകും.

സഭയെ തെറ്റിദ്ധരിപ്പിച്ച പി ടി തോമസ് മാപ്പ് പറയുകയാണ് വേണ്ടതെന്ന് മുഖ്യമന്ത്രി പറഞ്ഞു. 2016 ഫെബ്രുവരിയിലാണ് മാംഗോ കേസ് പ്രതികള്‍ അറസ്റ്റിലായത്. അന്ന് മുഖ്യമന്ത്രി ഉമ്മന്‍ ചാണ്ടിയായിരുന്നു. തെറ്റിദ്ധരിപ്പിക്കുന്ന പ്രസ്താവന നടത്തിയതിന് പി ടി തോമസ് സഭയില്‍ മാപ്പ് പറയണം.

പട്ടാപ്പകലിനെ കുറ്റാക്കൂരിട്ടായി ചിത്രീകരിക്കുന്ന രീതികള്‍ക്കായി സഭ ദുരുപയോഗം ചെയ്യരുത്. തെറ്റിദ്ധാരണയുടെ ഒരു മൂടല്‍ മഞ്ഞുണ്ടാക്കി ഇന്നത്തെ മുഖ്യമന്ത്രിയെ അതിന്റെ മറവില്‍ നിര്‍ത്താന്‍ നോക്കുക. അതാണ് നടന്നത്. മുഖ്യമന്ത്രിയെ നിങ്ങള്‍ കൊണ്ടുവരുന്ന മൂടല്‍ മഞ്ഞിന് കീഴ്പ്പെടുത്താനാകില്ല എന്നുമാത്രം പറയട്ടെയെന്നും പിണറായി കൂട്ടിച്ചേര്‍ത്തു.