അരിക്കൊമ്പന്‍ സിങ്കുകണ്ടത്ത്; വളഞ്ഞ് വനംവകുപ്പ്

ഇടുക്കി: അരിക്കൊമ്പനെ പിടികൂടുന്നതിനുള്ള ദൗത്യം രണ്ടാം ദിവസവും തുടരുന്നു. ഇന്ന് രാവിലെ ആരംഭിച്ച ദൗത്യത്തിനിടെ അരിക്കൊമ്പനെ സിങ്കുകണ്ടത്ത് കണ്ടെത്തിയതായാണ് വിവരം. വനംവകുപ്പിന്റെ സംഘം പ്രദേശം വളഞ്ഞിരിക്കുകയാണ്. ദൗത്യമേഖലയായ സിമന്റ്പാലത്തിലേക്ക് ആനയെ എത്തിക്കാനാണ് ശ്രമം നടക്കുന്നത്.

നിലവില്‍ ആന ജനവാസ മേഖലയായ സൂര്യനെല്ലി ഭാഗത്തേക്കാണ് നീങ്ങുന്നത്. അനുയോജ്യമായ സ്ഥലത്ത് കൊമ്പനെ കിട്ടിയാല്‍ മയക്കുവെടി വെക്കാനാണ് വനംവകുപ്പിന്റെ തീരുമാനം. ശനിയാഴ്ച്ച ദൗത്യം വിജയിച്ചില്ലെങ്കില്‍ ഞായറാഴ്ച്ചയും തുടരും.

കഴിഞ്ഞ ദിവസം അരിക്കൊമ്പനെ പിടിക്കാന്‍ 9 മണിക്കൂറിലേറെ നേരം തെരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞിരുന്നില്ല. വൈകീട്ട് മൂന്നു മണിയോടെ ദൗത്യസംഘം ശ്രമം അവസാനിപ്പിച്ച് മടങ്ങിയിരുന്നു.