ഡല്‍ഹി: രാജസ്ഥാന്‍ മുഖ്യമന്ത്രി അശോക് ഗെഹ്‌ലോട്ടിന്റെ സഹോദരന്‍ അഗ്രസെന്‍ ഗെഹ്‌ലോട്ടിന്റെ വീട്ടില്‍ സി.ബി.ഐ റെയ്ഡ്. അഴിമതിക്കേസുമായി ബന്ധപ്പെട്ടാണ് പരിശോധന. അഗ്രസെന്‍ ഗെഹ്‌ലോട്ടിന്റെ ഓഫിസിലും സി.ബി.ഐ സംഘം പരിശോധന നടത്തി.

വളം കയറ്റുമതി കേസില്‍ എന്‍ഫോഴ്‌സ്‌മെന്റ് ഡയറക്ടറേറ്റ് അഗ്രസെന്‍ ഗെഹ്‌ലോട്ടിനെതിരെ അന്വേഷണം നടത്തുന്നുണ്ട്. കേസുമായി ബന്ധപ്പെട്ട് അദ്ദേഹത്തെ ചോദ്യം ചെയ്യുകയും ചെയ്തിരുന്നു. 2007ലും 2009ലും വന്‍തോതില്‍ വളം അനധികൃതമായി കയറ്റുമതി ചെയ്‌തെന്നാണ് ഇ.ഡിയുടെ ആരോപണം.

ഇത് പകപോക്കല്‍ രാഷ്ട്രീയമാണെന്ന് കോണ്‍ഗ്രസ് നേതാവ് ജയറാം രമേശ് വിമര്‍ശിച്ചു 'ഇത് എല്ലാ അതിരുകളും ലംഘിക്കുന്ന പകപോക്കല്‍ രാഷ്ട്രീയമാണ്. കഴിഞ്ഞ മൂന്ന് ദിവസമായി ഡല്‍ഹിയില്‍ നടന്ന പ്രതിഷേധങ്ങളില്‍ അശോക് ഗെഹ്‌ലോട്ടാണ് മുന്‍നിരയില്‍ ഉണ്ടായിരുന്നത്. ഇതാണ് മോദി സര്‍ക്കാരിന്റെ പ്രതികരണം. ഞങ്ങള്‍ നിശബ്ദരാകില്ല' രാഹുല്‍ ഗാന്ധിയെ ഇ.ഡി ചോദ്യംചെയ്യുന്നതിനെതിരെ കോണ്‍ഗ്രസ് സംഘടിപ്പിച്ച പ്രതിഷേധം ചൂണ്ടിക്കാട്ടി ജയറാം രമേശ് പറഞ്ഞു.