പാലക്കാട്: പാലക്കാട് നഗരത്തില്‍ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയ യുവാവിനെ തിരിച്ചറിഞ്ഞു. പുതുപള്ളി തെരുവ് സ്വദേശിയായ അനസ് എന്നയാളാണ് മരിച്ചത്. മാനസിക രോഗിയായ അനസ് മര്‍ദനമേറ്റാണ് മരിച്ചത്.

സംഭവത്തില്‍ നരികുത്തി സ്വദേശി ഫിറോസിനെ നോര്‍ത്ത് പൊലിസ് കസ്റ്റഡിയിലെടുത്തു. അനസിനെ മര്‍ദിച്ചതായി കസ്റ്റഡിയിലുള്ള ഫിറോസ് മൊഴി നല്‍കി. ലേഡീസ് ഹോസ്റ്റല്‍ പരിസരത്ത് മോശമായി പെരുമാറിയപ്പോഴാണ് ഇടപ്പെട്ടതെന്നും ബാറ്റ് കൊണ്ട് തലക്ക് അബദ്ധത്തില്‍ അടിച്ചെന്നും ഫിറോസ് പറഞ്ഞു.

പാലക്കാട് വിക്ടോറിയ കോളേജ് പരിസരത്തായിരുന്നു മൃതദേഹം കിടന്നിരുന്നത്. അനസിന്റെ മൃതദേഹം പാലക്കാട് ജില്ലാ ആശുപത്രിയില്‍ സൂക്ഷിച്ചിരിക്കുകയാണ്.