മ്യൂണിക്
ഉക്രൈനിൽ അധിനിവേശം നടത്തുന്ന റഷ്യയെ ഒറ്റപ്പെടുത്താനുള്ള നടപടി ശക്തമാക്കാൻ ജി 7 രാജ്യങ്ങളുടെ നീക്കം. ഇതിന്റെ ഭാഗമായി റഷ്യയുടെ സ്വർണം ഇറക്കുമതി ചെയ്യുന്നതിന് വികസിത- വൻശക്തി രാജ്യങ്ങളുടെ കൂട്ടായ്മയായ ജി 7 ഉച്ചകോടിയിൽ ആലോചന. ജർമനിയിലെ മ്യൂണിക്കിൽ ഇന്നലെ തുടങ്ങിയ ഉച്ചകോടിയിൽ ഇതുസംബന്ധിച്ച പ്രഖ്യാപനമുണ്ടാകും.
അമേരിക്കയും ബ്രിട്ടനുമാണ് സ്വർണ ഇറക്കുമതിക്ക് ആദ്യം വിലക്കേർപ്പെടുത്തുക. എണ്ണ കഴിഞ്ഞാൽ റഷ്യയുടെ മുഖ്യവരുമാനമാർഗമാണ് സ്വർണ കയറ്റുമതി.
ഉക്രൈനിലെ അധിനിവേശവുമായി ബന്ധപ്പെട്ട് റഷ്യക്കെതിരായ നിലപാട് ഇതുവരെ സ്വീകരിക്കാത്ത ഇന്ത്യക്ക് ഈ നീക്കത്തോട് യോജിപ്പില്ല. ജി 7 രാജ്യങ്ങളിൽപ്പെടില്ലെങ്കിലും ഏഷ്യൻ വൻശക്തിയായ ഇന്ത്യ ഉച്ചകോടിയിൽ പ്രത്യേക ക്ഷണിതാവായി പങ്കെടുക്കുന്നുണ്ട്. ഉച്ചകോടിക്കായി പ്രധാനമന്ത്രി നരേന്ദ്രമോദി ഇന്നലെ ജർമനിയിലെത്തി. രണ്ടുദിവസത്തെ സന്ദർശനത്തിനായി ഇന്നലെ രാവിലെയാണ് പ്രധാനമന്ത്രി മ്യൂണിക്കിലെത്തിയത്. വൻ വരവേൽപ്പാണ് ജർമനിയിലെ ഇന്ത്യൻ സമൂഹം മോദിക്ക് നൽകിയത്.

ഇന്ന് സമാപിക്കുന്ന ഉച്ചകോടിയിൽ പരിസ്ഥിതി, ഊർജം, ഭക്ഷ്യസുരക്ഷ, ആരോഗ്യം തുടങ്ങിയവ ചർച്ചയാകും. ജർമൻ ചാൻസിലർ ഒലാഫ് ഷോൾസ്, അമേരിക്കൻ പ്രസിഡന്റ് ജോ ബൈഡൻ, ബ്രിട്ടീഷ് പ്രധാനമന്ത്രി ബോറിസ് ജോൺസൺ, ഫ്രഞ്ച് പ്രസിഡന്റ് ഇമ്മാനുവൽ മക്രോൺ, കനേഡിയൻ പ്രസിഡന്റ് ജസ്റ്റിൻ ട്രൂഡോ, ജപ്പാൻ പ്രധാനമന്ത്രി ഫുമിയോ കിഷിദ, ഇറ്റാലിയൻ പ്രധാനമന്ത്രി മരിയോ ദ്രാഗി എന്നിവരാണ് ഉച്ചകോടിയിൽ പങ്കെടുക്കുന്നത്.

ഇന്ത്യയെ കൂടാതെ അർജൻ്റീന, ഇന്തോനേഷ്യ, സെനഗൽ, ദക്ഷിണാഫ്രിക്ക എന്നീ രാഷ്ട്രങ്ങളും പ്രത്യേക ക്ഷണിതാക്കളാണ്.