ഇംഫാൽ•മണിപ്പൂരിലെ സൈനിക ക്യാംപിൽ ഉരുൾപൊട്ടിയതിനെ തുടർന്ന് എട്ടുപേർ കൊല്ലപ്പെട്ടു. 50 പേരെ കാണാതായതായും റിപ്പോർട്ടുണ്ട്. നോനെ ജില്ലയിലെ 107 ടെറിട്ടോറിയൽ ആർമി ക്യാംപിലാണ് ബുധനാഴ്ച രാത്രിയുണ്ടായ ഉരുൾപൊട്ടൽ വൻ ദുരന്തം വിതച്ചത്.

മരിച്ചവരിൽ ഒരാൾ പ്രദേശത്ത് ഇംഫാൽ-ജിരിബാം റെയിൽവേ നിർമാണ ജോലിയിൽ ഏർപ്പെട്ടിരുന്നയാളാണ്. റെയിൽവേ പദ്ധതിക്ക് സുരക്ഷ നൽകാൻ നിയോഗിക്കപ്പെട്ട സൈനിക ക്യാംപിലാണ് കൂടുതൽ പേർ മരിച്ചത്. ദേശീയ ദുരന്ത നിവാരണ സേന, എസ്.ഡി.ആർ.എഫ്, പൊലിസ്, ഫയർഫോഴ്‌സ് എന്നിവയ്ക്കു പുറമെ റെയിൽവേ ജീവനക്കാരും രക്ഷാപ്രവർത്തനം നടത്തി.ഉരുൾപൊട്ടലിനെ തുടർന്ന് സമീപത്തെ ഇജയ് നദിയുടെ ഒഴുക്ക് തടസപ്പെടുകയും ഡാമിലെന്നപോലെ ജലം കെട്ടിനിന്ന് നദി ദിശമാറി ഒഴുകുകയും ചെയ്തതായി റിപ്പോർട്ടുണ്ട്.