ദുബായ്: വിപുലീകരണത്തിന്റെ ഭാഗമായി ദുബായ് ആസ്ഥാനമായുള്ള എയർലൈൻ ഫ്ലൈ ദുബായ് ഈ വർഷം 1,000 ജീവനക്കാരെ നിയമിക്കുമെന്ന് റിപ്പോർട്ട്. മിഡിൽ ഈസ്റ്റ്, ആഫ്രിക്ക, യൂറോപ്പ്, ഏഷ്യ എന്നിവിടങ്ങളിലെ 110 ലധികം വിമാനത്താവളങ്ങളിലേക്ക് സർവീസ് നടത്തുന്ന ഫ്ലൈ ദുബായ് വിവിധ വകുപ്പുകളിലുടനീളം അതിന്റെ തൊഴിലാളികളെ ശക്തിപ്പെടുത്തും.

ഈ വർഷം 1,120 പുതിയ ജീവനക്കാർ ജോലിയിൽ ചേരുമെന്ന് ഫ്ലൈ ദുബായ് വക്താവ് വെളിപ്പെടുത്തി.

യുഎഇ ആസ്ഥാനമായുള്ള ഈ ലോ-കോസ്റ്റ് കാരിയർ ഈ വർഷം ആദ്യം മുതൽ 320 ജീവനക്കാരെയും 2023 അവസാനത്തോടെ ബിസിനസിലുടനീളം വിവിധ തസ്തികകളിലേക്ക് 800-ലധികം പുതിയ ജീവനക്കാരെയും ഉൾപ്പെടുത്തിയിട്ടുണ്ട്. ഇതിൽ പൈലറ്റുമാർ, ക്യാബിൻ ക്രൂ, എഞ്ചിനീയർമാർ, ഓഫീസ്- അടിസ്ഥാനമാക്കിയുള്ള ജീവനക്കാർ എന്നിവർ ഉൾപ്പെടുമെന്നാണ് റിപ്പോർട്ട്‌.

പുതിയ ജീവനക്കാരെ നിയമിക്കുന്നതോടെ കഴിഞ്ഞ വർഷത്തെ അപേക്ഷിച്ച് എയർലൈനിന്റെ തൊഴിൽ ശക്തിയിൽ 24 ശതമാനം വർധനയുണ്ടാകും. എയർലൈനിൽ 136 രാജ്യക്കാർ ജോലി ചെയ്യുന്നു. മൊത്തം 4,918 തൊഴിലാളികൾ സ്ഥാപനത്തിൽ ഉണ്ട്. ഈ വർഷാവസാനത്തോടെ ഇത് 5,774 ൽ എത്തുമെന്നാണ് പ്രവചനം. ഫ്‌ളൈദുബായ് തൊഴിലാളികളിൽ 36 ശതമാനവും സ്ത്രീകളാണ്.