തിരുവനന്തപുരം: കേരളത്തെ ബഫര്‍സോണ്‍ മേഖലകളില്‍ നിന്ന് ഒഴിവാക്കണമെന്ന് കേരളം കേന്ദ്രത്തോട്. ബഫര്‍സോണ്‍ സോണില്‍ സുപ്രിം കോടതിവിധി മൂലമുള്ള ആശങ്ക തീര്‍ക്കാന്‍ എല്ലാവഴികളും തേടാന്‍ മുഖ്യമന്ത്രി കഴിഞ്ഞ ദിവസം വിളിച്ച ഉന്നത തലയോഗത്തില്‍ തീരുമാനിച്ചിരുന്നു.
കേരളത്തിനായി കേന്ദ്ര സര്‍ക്കാര്‍ നിയമനിര്‍മാണം നടത്തണമെന്നാണാവശ്യം. ഇക്കാര്യം ആവശ്യപ്പെട്ട് നിയമസഭയില്‍ പ്രമേയം അവതരിപ്പിക്കാനാണ് സര്‍ക്കാര്‍ തീരുമാനം. വനം മന്ത്രി എ.കെ ശശീന്ദ്രനാണ് സഭയില്‍ പ്രമേയം അവതരിപ്പിക്കുക. വിഷയത്തില്‍ ഭരണപക്ഷവും പ്രതിപക്ഷവും തമ്മിലുള്ള ഭിന്നത മറന്ന് ഒരുമിക്കാനാണ് തീരുമാനം.
സുപ്രിം കോടതിയില്‍ റിവ്യു ഹരജി വേഗത്തിലാക്കാനും ഏരിയല്‍ സര്‍വേ ഉടന്‍ പൂര്‍ത്തിയാക്കി ഉന്നതാധികാരസമിതിക്ക് റിപ്പോര്‍ട്ട് നല്‍കുവാനുമാണ് തീരുമാനം. കേന്ദ്രത്തിന് മേല്‍ സമ്മര്‍ദ്ദം ചെലുത്താന്‍ മുഖ്യമന്ത്രി നേരിട്ട് ഇടപെടുകയും ചെയ്യും.

നേരത്തെ ഭരണ പ്രതിപക്ഷം പരസ്പരം പഴിചാരുകയായിരുന്നു. ജനവാസ മേഖലകളെയും ബഫര്‍സോണ്‍ പരിധിയില്‍ ഉള്‍പ്പെടുത്തിയുള്ള ഇടത് സര്‍ക്കാര്‍ ഉത്തരവാണ് സുപ്രിം കോടതി വിധിക്ക് കാരണമെന്നായിരുന്നു നേരത്തെ പ്രതിപക്ഷ ആരോപണം. യു.ഡി.എഫ്-യു.പി.എ സര്‍ക്കാര്‍ നിലപാടുകളാണ് പ്രതിസന്ധിക്ക് കാരണമെന്നും സര്‍ക്കാറും തിരിച്ചടിച്ചിരുന്നു.