ചെന്നൈ മലയാളികളായ മൂന്നംഗ കുടുംബം തൃശൂരിലെ ഹോട്ടലിൽ ആത്മഹത്യ ചെയ്ത നിലയിൽ

തൃശൂർ: തൃശൂരിൽ മൂന്നംഗ കുടുംബം ഹോട്ടൽ മുറിയിൽ ആത്മഹത്യ ചെയ്ത നിലയിൽ. കെ.എസ്.ആർ.ടി.സി സ്റ്റാൻഡിന് സമീപത്തെ ഹോട്ടലിലാണ് ചെന്നൈ മലയാളികളായ ഒരു കുടുംബത്തിലെ മൂന്നുപേരെ മരിച്ച നിലയിൽ കണ്ടെത്തിയത്. സന്തോഷ് പീറ്റർ, ഭാര്യ സുനി പീറ്റർ, മകൾ ഐറിൻ എന്നിവരാണ് മരിച്ചത്. മരിച്ച സ്ത്രീയുടെ വിലാസത്തിലുള്ളത് പ്രകാരം ഇവർ തൃപ്പൂണിത്തുറ സ്വദേശികളാണ്.

ഇന്നലെ രാത്രി റൂം തുറക്കാതായതോടെ ഹോട്ടൽ ജീവനക്കാർ പൊലിസിൽ അറിയിക്കുകയായിരുന്നു. പൊലീസെത്തി വാതിൽ തുറന്നപ്പോഴാണ് മൂവരെയും മരിച്ച നിലയിൽ കണ്ടത്. കഴിഞ്ഞ നാലാം തിയതിയാണ് ഇവർ ലോഡ്ജിൽ മുറിയെടുത്തത്.

ഹോട്ടലിലെ റൂമിൽ നിന്നും ആത്മഹത്യാക്കുറിപ്പ് കണ്ടെത്തിയിട്ടുണ്ട്. കുടുംബം സാമ്പത്തികമായി കബളിപ്പിക്കപ്പെട്ടെന്നും ഇതേതുടർന്ന് ജീവനൊടുക്കാൻ തീരുമാനിക്കുകയായിരുന്നുവെന്നുമാണ് ആത്മഹത്യാക്കുറിപ്പിൽ എഴുതിയിരിക്കുന്നത്.