ബിരുദ ഫലം പ്രസിദ്ധീകരിച്ചിട്ടും സപ്ലിമെന്ററി ഫലമില്ല

കോഴിക്കോട്: കാലിക്കറ്റ് സര്‍വ്വകലാശാല അവസാന വര്‍ഷ ബിരുദ പരീക്ഷാഫലം വന്നിട്ടും സപ്ലിമെന്ററി പരീക്ഷാഫലം പ്രസിദ്ധീകരിക്കാത്തത് വിദ്യാര്‍ഥികളെ ആശങ്കയിലാക്കുന്നു. പരീക്ഷാഫലം വൈകുന്നതോടെ വിദ്യാര്‍ഥികളുടെ ഒരു വര്‍ഷമാണ് നഷ്ടമാവുക. ഇതുകാരണം ഈ കുട്ടികള്‍ക്ക് പുതിയ കോഴ്‌സുകള്‍ക്കും പ്രവേശനപരീക്ഷകള്‍ക്കും മറ്റും അപേക്ഷിക്കാനാവാത്ത സ്ഥിതിയാണ്.

കഴിഞ്ഞമാസമാണ് അവസാന സെമസ്റ്റര്‍ ഫലംവന്നത്. അതേസമയം സപ്ലിമെന്ററി പരീക്ഷാഫലം വരാന്‍ ഇനിയും മൂന്നോ നാലോ മാസം വേണ്ടിവരും. അപ്പോഴേക്കും മറ്റ് കോഴ്‌സുകളിലേക്ക് അപേക്ഷിക്കുന്നതിനുള്ള സമയം കഴിയും. അതോടെ ഈ വര്‍ഷം വിദ്യാര്‍ഥികള്‍ക്ക് നഷ്ടമാവുകയും ചെയ്യും.

വിജയം നേടാനാവാത്തവര്‍ക്കുപുറമെ ആരോഗ്യപ്രശ്‌നങ്ങളാല്‍ പരീക്ഷയെഴുതാന്‍ കഴിയാത്തവരും ഇംപ്രൂവ്‌മെന്റിനുള്ളവരും സപ്ലിമെന്ററി പരീക്ഷ എഴുതാറുണ്ട്.

അതേസമയം ലക്ഷക്കണക്കിന് കുട്ടികളെഴുതുന്ന പരീക്ഷയായതിനാലാണ് മൂല്യനിര്‍ണയം താമസിക്കുന്നതെന്നും എങ്കിലും എത്രയും പെട്ടെന്ന് പൂര്‍ത്തിയാക്കാനുള്ള ശ്രമം നടക്കുന്നുണ്ടെന്നും പരീക്ഷാ കണ്‍ട്രോളര്‍ വ്യക്തമാക്കി.