കേന്ദ്ര സര്‍വകലാശാലകളിലേക്കുളള ബിരുദാനന്തര ബിരുദ കോഴ്‌സുകള്‍ക്ക് അഡ്മിഷന്‍ ലഭിക്കുന്നതിനായി വിദ്യാര്‍ത്ഥികള്‍ മറികടക്കേണ്ട കടമ്പകളിലൊന്നാണ് കോമണ്‍ യൂണിവേഴ്‌സിറ്റി എന്‍ട്രന്‍സ് ടെസ്റ്റ് പോസ്റ്റ് ഗ്രാഡുവേറ്റ് (സി.യു.ഇ.ടി). 2023 ലെ സി.യു.ഇ.ടി എന്‍ട്രന്‍സ് എക്‌സാമുകള്‍ ജൂണ്‍ 30നാണ് അവസാനിച്ചത്. നാഷണല്‍ ടെസ്റ്റിങ് ഏജന്‍സി (എന്‍.ടി.എ) നടത്തുന്ന ഈ പരീക്ഷ ഇന്ത്യയിലും,വിദേശ രാജ്യങ്ങളിലുമായി 245 നഗരങ്ങളിലാണ് ഇത്തവണ സംഘടിക്കപ്പെട്ടത്.

കംപ്യൂട്ടറധിഷ്ടിതമായ രീതിയിലാണ് എക്‌സാം സംഘടിക്കപ്പെട്ടത്. ജൂലൈ 17ന് നടക്കേണ്ട എക്‌സാം പലവിധ കാരണങ്ങളാല്‍ ജൂണ്‍ 30 വരെ നീണ്ട്‌പോയതിനാല്‍ ജൂലൈ ആദ്യ വാരത്തില്‍ പരീക്ഷയുടെ ആന്‍സര്‍ കീ പ്രസിദ്ധീകരിക്കപ്പെടാനാണ് സാധ്യത. എന്‍.ടി.എ യുടെ ഔദ്യോഗിക വെബ്‌സൈറ്റായ cuet.nta.nic.in. വഴി ആന്‍സര്‍ കീ ഡൗണ്‍ലോഡ് ചെയ്യാന്‍ സാധിക്കുന്നതാണ്.

ആന്‍സര്‍ കീയില്‍ എന്തെങ്കിലും പിഴവുകള്‍ കണ്ടെത്തിയാല്‍ പരീക്ഷാ അധികൃതരെ അത് അറിയിക്കാനുളള അവസരമുണ്ട്. ശേഷം തെറ്റ് തിരുത്തിയ ആന്‍സര്‍ കീ എന്‍.ടി.എ പ്രസിദ്ധീകരിക്കുന്നതായിരിക്കും.പിന്നീടാണ് ആന്‍സര്‍ കീയെ അടിസ്ഥാനമാക്കിയുളള റാങ്ക് ലിസ്റ്റ് പുറത്ത് വിടുന്നത്.

മുന്‍വര്‍ഷത്തെ ടൈംലൈനിന്റെ അടിസ്ഥാനത്തില്‍, താല്‍ക്കാലിക ഉത്തരസൂചികകള്‍ പുറത്തിറക്കി 10 ദിവസത്തിനകം CUET PG 2023 ഫലങ്ങള്‍ പ്രഖ്യാപിക്കുമെന്ന് പ്രതീക്ഷിക്കാം.

Content Highlights:cuet pg 2023 provisional answer key results awaited check details