ഇന്ത്യനൂര്‍: നാട്ടുകാര്‍ക്കും വിദ്യാര്‍ഥികള്‍ക്കും കോട്ടൂരില്‍ സ്‌കൂളിനു സമീപം ബസ്‌കാത്തിരിപ്പു കേന്ദ്രം നിര്‍മിക്കുന്നതിനു വീട്ടുവിഭവങ്ങള്‍ വില്‍പന നടത്തി കോട്ടൂര്‍ എ.കെ.എം.എച്ച്.എസ്.എസ്  വിദ്യാര്‍ഥികള്‍ വിഭവ സമാഹരണ യജ്ഞവുമായി രംഗത്ത്.  ഇന്നും നാളെയുമായി നടക്കുന്ന സ്‌കൂള്‍ കലാമേളയോടനുബന്ധിച്ച് വീട്ടുവിഭവങ്ങള്‍ വില്‍പന നടത്തി  പണംസമാഹരിക്കുകയാണ് സ്‌കൂള്‍ എന്‍.എസ്.എസ് യൂനിറ്റ്.
വീടുകളില്‍ നിന്നുണ്ടാക്കിയ അച്ചാറുകള്‍, ഉപ്പിലിട്ട സാധനങ്ങള്‍, പായസം, ഫുഡിങ്, ഐസ്‌ക്രീം, ബിരിയാണി, ഫ്രൂട്‌സ് അടക്കം വിവിധയിനം പലഹാരങ്ങള്‍ എന്നിവയാണ് വിദ്യാര്‍ഥികള്‍ വിപണന മേളയിലൊരുക്കിയിട്ടുള്ളത്.  സ്‌കൂള്‍ കലോത്സവം സിനിമ, സീരിയല്‍ ആര്‍ടിസ്റ്റ് സൂരജ് തേലക്കാട് ഉദ്ഘാടനം ചെയ്തു. വിപണനമേള ഉദ്ഘാടനം സ്‌കൂള്‍ മാനേജര്‍ കറുത്തേടത്ത് ഇബ്രാഹീം ഹാജി നിര്‍വഹിച്ചു. പ്രധാനാധ്യാപകന്‍ ബഷീര്‍ കുരുണിയന്‍, പ്രിന്‍സിപ്പല്‍ അലി കടവണ്ടി,  സ്റ്റാഫ് സെക്രട്ടറി അനീസ് റഹ്മാന്‍ സംസാരിച്ചു.