'ഹര്‍ഷിനയ്ക്ക് നീതി ഉറപ്പാക്കും'; മെഡിക്കല്‍ ബോര്‍ഡ് റിപ്പോര്‍ട്ട് തള്ളി ആരോഗ്യമന്ത്രി

തിരുവനന്തപുരം: പ്രസവ ശസ്ത്രയ്ക്കിടെ വയറ്റില്‍ കത്രിക കുടുങ്ങിയ സംഭവത്തില്‍ ഹര്‍ഷിനയ്ക്ക് നീതി ഉറപ്പാക്കുമെന്ന് ആരോഗ്യമന്ത്രി വീണാ ജോര്‍ജ് നിയമസഭയില്‍ പറഞ്ഞു. വസ്തുത കണ്ടെത്താന്‍ കഴിയില്ലെന്ന തരത്തിലുള്ള റിപ്പോര്‍ട്ടൊന്നും അംഗീകരിക്കാന്‍ കഴിയില്ലായെന്നും കുറ്റക്കാര്‍ക്കെതിരേ കര്‍ശന നടപടി സ്വീകരിക്കുമെന്നും മന്ത്രി വ്യക്തമാക്കി.

രണ്ട് മെഡിക്കല്‍ റിപ്പോര്‍ട്ട് ആരോഗ്യ വകുപ്പ് തള്ളിയതാണ്. അതിന് ശേഷമാണ് പൊലീസ് അന്വേഷണത്തിന് ശുപാര്‍ശ ചെയ്തത്. ചികിത്സാ പിഴവ് ആരുടെ ഭാഗത്ത് നിന്നാണുണ്ടായതെന്ന് കണ്ടെത്തി നടപടി സ്വീകരിക്കും. സര്‍ക്കാര്‍ ഹര്‍ഷിനക്ക് നീതി ഉറപ്പാക്കുമെന്നും മന്ത്രി നിയമസഭയില്‍ പറഞ്ഞു.

അതേസമയം ആരോഗ്യ മന്ത്രി അന്നുമുതല്‍ ഹര്‍ഷിനയെ വിശ്വസിക്കുന്നു എന്ന് പറയുന്നതല്ലാതെ പത്ത് മാസത്തില്‍ മേലെയായിട്ടും തെരുവില്‍ 80 ദിവസം ഇരുന്നിട്ടും ഇതുവരെ നീതി നടപ്പാക്കാനോ അനുകൂലമായ നല്ല പ്രതികരണം പ്രവര്‍ത്തിയിലൂടെ കാണിക്കാനോ ഇതുവരെ കഴിഞ്ഞട്ടില്ലെന്ന് ഹര്‍ഷിന പറഞ്ഞു. പൊലീസ് സത്യസന്ധമായി അന്വേഷിച്ച് കണ്ടെത്തിയ റിപ്പോര്‍ട്ടാണ് മെഡിക്കല്‍ ബോര്‍ഡ് വളരെ ക്രൂരമായി തള്ളിയത്. നീതി ഉറപ്പാക്കുമെന്ന് പറയാതെ ഉറപ്പാക്കി കാണിക്കുമെന്ന് വിശ്വസിക്കുന്നുവെന്നും ഹര്‍ഷിന കൂട്ടിചേര്‍ത്തു.