പുതിയ വേഗവും സമയവും തേടി കായികകൗമാരം ട്രാക്കിലിറങ്ങി. സംസ്ഥാന സ്‌കൂള്‍ കായിക മേള അത്‌ലറ്റ്ക്‌സില്‍ മലപ്പുറത്തിനാണ് ആദ്യ സ്വര്‍ണം. സീനിയര്‍ 5000 മീറ്ററില്‍ ഐഡിയല്‍ കടകശ്ശേരി സ്‌കൂളിലെ മുഹമ്മദ് സുല്‍ത്താന്‍ ആണ് സ്വര്‍ണം നടിയത്. ഇതേ സ്‌കൂളിലെ തന്നെ എ.വി ദില്‍ജിത്ത് വെങ്കലവും സ്വന്തമാക്കി. 

സംസ്ഥാന സ്‌കൂള്‍ കായികമേളയുടെ മൂന്നാം ദിവസത്തില്‍ പുലര്‍ച്ചെ ആറ് മണിക്ക് മഹാരാജാസ് കോളജ് ഗ്രൗണ്ടില്‍ 5000 മീറ്റര്‍ നടത്തം ഫൈനല്‍ മത്സരത്തോടെയാണ് അത്‌ലറ്റിക് ഇനങ്ങള്‍ക്ക് തുടക്കം കുറിച്ചത്്. 98 ഇനങ്ങളില്‍ 15 എണ്ണത്തിന്റെ ഫൈനല്‍ ഇന്ന് നടക്കുന്നതോടെ ട്രാക്കും ഫീല്‍ഡും ആവേശത്തിലാകും. മത്സരങ്ങളുടെ രണ്ടാം ദിനത്തില്‍ എട്ട് മീറ്റ് റെക്കോര്‍ഡുകള്‍ കൂടി നീന്തല്‍കുളത്തില്‍ പിറന്നു. 

ഇതോടെ 15 റെക്കോര്‍ഡുകള്‍ പഴങ്കകഥയായി. 348 ഗെയിംസ് മത്സരയിനങ്ങളും അക്വാട്ടിക്‌സ് വിഭാഗത്തില്‍ 56 മത്സരയിനങ്ങളും പൂര്‍ത്തിയായപ്പോള്‍ തിരുവനന്തപുരം ജില്ല 853 പോയിന്റുമായി മുന്നേറ്റം തുടരുകയാണ്. 
91 സ്വര്‍ണവും 76 വെള്ളിയും 79 വെങ്കലവുമാണ് തിരുവനന്തപുരത്തിന്റെ രണ്ട് ദിവസത്തെ സമ്പാദ്യം. 49 സ്വര്‍ണവും 37 വെള്ളിയും 51 വെങ്കലവുമായി 469 പോയിന്റുമായി കണ്ണൂര്‍ രണ്ടാം സ്ഥാനത്തും 49 സ്വര്‍ണവും 30 വെള്ളിയും 50 വെങ്കലവുമായി 449 പോയിന്റുമായി തൃശൂര്‍ ജില്ല മൂന്നാം സ്ഥാനത്തുമാണ്. 371 പോയിന്റുമായി പാലക്കാടും 290 പോയിന്റുമായി മലപ്പുറവുമാണ് പിന്നില്‍. ഗെയിംസ് ഇനങ്ങളില്‍  സ്‌കൂള്‍ വിഭാഗത്തില്‍ തിരുവന്തപുരം സെന്റ് ജോസഫ്‌സ് എച്ച്്.എസ്.എസ് തന്നെയാണ് മുന്നില്‍. തൊട്ടുപിന്നിലായി തലസ്ഥാന സ്‌കൂളുകളായ വട്ടിയൂര്‍ക്കാവ് ഗവ എച്ച്.എസ്.എസും കോട്ടണ്‍ഹില്‍ ഗവ. ഗേള്‍സ് എച്ച്.എസ്.എസുമാണ് ഉള്ളത്.  കോതമംഗലം എം.എ കോളജിലെ നീന്തല്‍കുളത്തില്‍ 56 ഇനങ്ങളില്‍ മത്സരം പൂര്‍ത്തീകരിച്ചപ്പോള്‍ 353 പോയിന്റുമായി തിരുവനന്തപുരം തന്നെയാണ് അക്വാട്ടിക്്‌സില്‍ മുന്നില്‍. 101 പോയിന്റുമായി എറണാകുളവും 59 പോയിന്റുമായി തൃശൂരും പിന്നിലുണ്ട്.  തിരുവനന്തപുരം തുണ്ടത്തില്‍ എം.വി.എച്ച്.എസ്.എസിലെ താരങ്ങളാണ് ഏറ്റവും കൂടുതല്‍ സ്വര്‍ണം സ്വമ്മിംഗ് പൂളില്‍ നി്ന്ന് വാരിയത്.   89 പോയിന്റാണ് ഇവരുടെ സാമ്പാദ്യം. രണ്ടാം ദിനത്തിലെ മീറ്റ് റെക്കോര്‍ഡുകളും നീന്തല്‍ മത്സരങ്ങളിലായിരുന്നു.