ദുബൈ: യു.എ.ഇയില്‍ വിവിധ സ്ഥലങ്ങളില്‍ ചൊവ്വാഴ്ച വേനല്‍ മഴ ലഭിച്ചു. രാവിലെ മുതല്‍ അന്തരീക്ഷം മേഘാവൃതമായിരുന്നു. രാജ്യത്തിന്റെ ചില ഭാഗങ്ങളില്‍ വേനല്‍മഴ ലഭിച്ചതായി റിപ്പോര്‍ട്ടുണ്ട്. അല്‍ ഐന്‍, അബൂദബി, ഹത്ത എന്നിവിടങ്ങളില്‍ മഴ ലഭിച്ചപ്പോള്‍ ദുബൈയുടെ ചില ഭാഗങ്ങളില്‍ ചാറ്റല്‍ മഴ പെയ്തതായി നാഷണല്‍ സെന്റര്‍ ഓഫ് മെറ്റീരിയോളജി (എന്‍.സി.എം) അറിയിച്ചു.പല സ്ഥലങ്ങളിലും മഴ പെയ്യുന്നതിന്റെ വിഡിയോ സോഷ്യല്‍മീഡിയകളില്‍ പ്രചരിക്കുന്നുണ്ട്. മഴ വന്നതോടെ താപനിലയില്‍ ഗണ്യമായ കുറവ് രേഖപ്പെടുത്തി. വരുംദിവസങ്ങളിലും രാജ്യത്ത് മഴ ലഭിക്കുമെന്ന് കാലാവസ്ഥാ കേന്ദ്രം പ്രവചിച്ചു. ശനിയാഴ്ച വരെ രാജ്യത്ത് മേഘാവൃതമായ അന്തരീക്ഷം തുടരുമെന്നും അതോറിറ്റി പുറത്തിറക്കിയ കാലാവസ്ഥാ ബുള്ളറ്റിന്‍ പറയുന്നു.