കൊല്ലം: കൊല്ലത്ത് ടോള്‍ പ്ലാസ ജീവനക്കാരനെ കാര്‍ യാത്രികന്‍ വലിച്ചിഴച്ച കേസില്‍ പൊലിസ് പ്രതിയെ തിരിച്ചറിഞ്ഞു. വര്‍ക്കല സ്വദേശി ലഞ്ജിത്താണ് ജീവനക്കാരനെ മര്‍ദിച്ചത്. ലഞ്ജിത്തിനൊപ്പം ഉണ്ടായിരുന്ന സുഹൃത്തിനെ കസ്റ്റഡിയിലെടുത്തു. ഒളിവില്‍ പോയ ലഞ്ജിത്തിനെ കണ്ടെത്താനുള്ള അന്വേഷണം പൊലിസ് ഊര്‍ജ്ജിതമാക്കിയിരിക്കുകയാണ് .

ഇന്നലെയാണ് സംഭവം.ആലപ്പുഴയില്‍ നിന്നും മടങ്ങുവഴിയാണ് പ്രതി ടോള്‍പ്ലാസ ജീവനക്കാരന്‍ അരുണിനെ മര്‍ദിച്ചത്. കുരീപ്പുഴ സ്വദേശി അരുണിനാണ് മര്‍ദനമേറ്റത്. ടോള്‍ നല്‍കാതെ പ്ലാസയുടെ എമര്‍ജന്‍സി ഗേറ്റിലൂടെ കടന്നു പോകുന്നത് ചോദ്യം ചെയ്തതാണ് ജീവനക്കാരന്റെ മര്‍ദനത്തില്‍ കലാശിച്ചത്.

അരുണിന്റെ കഴുത്തില്‍ കുത്തിപിടിക്കുകയും ഓടുന്ന കാറില്‍ റോഡിലൂടെ ഏറെ ദൂരം പിടിച്ചു വലിച്ചു കൊണ്ടു പോകുകയും ചെയ്തു. ഈ സംഭവത്തിന്റെ സി.സി.ടിവി ദൃശ്യങ്ങള്‍ പുറത്തുവന്നിരുന്നു. രണ്ടു പേരാണ് കാറില്‍ ഉണ്ടായിരുന്നതെന്ന് അരുണ്‍ മൊഴി നല്‍കുകയും ചെയ്തിരുന്നു.

കാലിന് പരിക്കേറ്റ ജീവനക്കാരനെ ആശുപത്രിയില്‍ പ്രവേശിപ്പിച്ചു. അഞ്ചാലംമൂട് പൊലിസ് ആണ് കേസ് അന്വേഷിക്കുന്നത്.