ന്യൂഡല്‍ഹി: രാഹുല്‍ ഗാന്ധിക്കെതിരെ രൂക്ഷ വിമര്‍ശനവുമായി ഗുലാം നബി ആസാദിന്റെ രാജിക്കത്ത്. രാഹുല്‍ ഗാന്ധിയുടെ നേതൃത്വത്തില്‍ പാര്‍ട്ടി വലിയ തിരിച്ചടി നേരിട്ടെന്ന് കത്തില്‍ ചൂണ്ടിക്കാട്ടുന്നു. തീരുമാനം എടുത്തത് വേദനയോടെ. പാര്‍ട്ടിയില്‍ റിമോട്ട് കണ്‍ട്രോള്‍ ഭരണം. റിമോട്ട് കണ്‍ട്രോള്‍ മോഡല്‍ യു.പി.എയുടെ ആര്‍ജ്ജവം തകര്‍ത്തെന്നും അദ്ദേഹം തുറന്നടിച്ചു.

എല്ലാം രാഹുല്‍ ഗാന്ധി. പാര്‍ട്ടിയില്‍ രാഹുല്‍ ഗാന്ധി പുതിയ ഉപജാപക വൃന്ദത്തെ സൃഷ്ടിച്ചു. ഉപജാപക വൃന്ദത്തിന്റെ നിര്‍ദ്ദേശങ്ങളാണ് നടപ്പാക്കുന്നത്. മുതിര്‍ന്നവരും പരിചയ സമ്പന്നരുമായ നേതാക്കളെ ഒതുക്കി. സ്തുതി പാഠകരെ സംഘടനാ കാര്യങ്ങള്‍ ഏല്‍പിച്ചു. രാഹുലിന്റെ സുരക്ഷാ ജീവനക്കാരും പി.എയും വരെ കാര്യങ്ങള്‍ തൂീരുമാനിക്കുന്നുവെന്നും അദ്ദേഹം കത്തില്‍ ആഞ്ഞടിക്കുന്നു. രാഷ്ട്രീയ ഇടം ബി.ജെ.പിക്ക് വിട്ടുനല്‍കിയെന്നും അദ്ദേഹം കുറ്റപ്പെടുത്തുന്നു.

പാര്‍ട്ടിയെ ശക്തിപ്പെടുത്താനുള്ള നിര്‍ദ്ദേശങ്ങള്‍ സമയബന്ധിതമായി നടപ്പാക്കുന്നില്ലെന്നും അദ്ദേഹം ചൂണ്ടിക്കാട്ടി. താന്‍ നല്‍കിയ നിര്‍ദ്ദേശങ്ങള്‍ ഒമ്പതു വര്‍ഷമായി ചവറ്റുകൂനയിലാണെന്നും അദ്ദേഹം രാജിക്കത്തില്‍ ആരോപിക്കുന്നു.

ഇന്ന് രാവിലെയാണ് കോണ്‍ഗ്രസിന്റെ മുതിര്‍ന്ന നേതാവായ ഗുലാം നബി ആസാദ് കോണ്‍ഗ്രസില്‍ നിന്നും രാജവെച്ചത്. എല്ലാ പാര്‍ട്ടി പദവികളില്‍ നിന്നും പ്രാഥമികാംഗത്വത്തില്‍ നിന്നും അദ്ദേഹം രാജി വെച്ചു. പാര്‍ട്ടി അധ്യക്ഷ സോണിയാ ഗാന്ധിക്ക് രാജിക്കത്ത് സമര്‍പ്പിച്ചു.