കൊടുവള്ളി: ബൈക്കിലെത്തി മൊബൈല്‍ ഫോണ്‍ കവര്‍ന്ന് കടന്നുകളയാന്‍ ശ്രമിക്കുന്നത് തടയുന്നതിനിടെ മോഷ്ടാക്കള്‍ ഇതര സംസ്ഥാന തൊഴിലാളിയെ ബൈക്കില്‍ വലിച്ചിഴച്ചു. എളേറ്റില്‍ വട്ടോളിയിലാണ് ദാരുണമായ സംഭവം. ബിഹാര്‍ സ്വദേശി അലി അക്ബറിനെയാണ് ബൈക്കില്‍ 200 മീറ്ററോളം റോഡിലൂടെ വലിച്ചിഴച്ചത്.
എളേറ്റില്‍ ഇയ്യാട് റോഡില്‍ ബൈക്കിലെത്തിയ മോഷ്ടാക്കള്‍ റോഡരികില്‍ നില്‍ക്കുകയായിരുന്ന അലിയുടെ അടുത്തെത്തി ആരെയോ വിളിക്കാനെന്നു പറഞ്ഞ് മൊബൈല്‍ ഫോണ്‍ ആവശ്യപ്പെട്ടു.

ബൈക്കില്‍ പിന്നിലുണ്ടായിരുന്നയാള്‍ ഫോണ്‍ കൈക്കലാക്കിയ ശേഷം നമ്പര്‍ ഡയല്‍ ചെയ്ത് സംസാരിക്കുന്നതായി നടിക്കുകയും ഉടന്‍ ബൈക്ക് മുന്നോട്ടെടുക്കുകയും ചെയ്തു. ബൈക്കില്‍ പിടിച്ചുനില്‍ക്കുകയായിരുന്ന അലിയെ റോഡിലൂടെ വലിച്ചിഴയ്ക്കുകയായിരുന്നു.
റോഡില്‍ വീണ അലി വീണ്ടും ബൈക്കിനെ പിന്തുടര്‍ന്നു. ഇതിനിടെ റോഡിലേക്കു തെറിച്ചുവീണ ബൈക്കിന്റെ പിന്നിലിരുന്നയാളെ അലി പിന്തുടര്‍ന്നെങ്കിലും പിടികൂടാനായില്ല. ഇയാളുടെ മൊബൈല്‍ ഫോണ്‍ റോഡിലേക്ക് തെറിച്ചുവീണു. ഇത് നാട്ടുകാര്‍ കൊടുവള്ളി പൊലിസിനു കൈമാറി. ഈ ഫോണ്‍ കേന്ദ്രീകരിച്ചു നടത്തിയ അന്വേഷണത്തിലാണ് കാക്കൂര്‍ മഞ്ഞളാംകണ്ടി മീത്തല്‍ ഷംനാസ് (23), കാക്കൂര്‍ കുന്നുമ്മല്‍ താഴം സനു കൃഷ്ണ (18) എന്നിവരെ പൊലിസ് പിടികൂടിയത്. ഷംനാസ് നേരത്തെ കഞ്ചാവ് കേസില്‍ പ്രതിയാണെന്ന് പൊലിസ് പറഞ്ഞു.
കാലിനു പരുക്കേറ്റ അലി താമരശ്ശേരി താലൂക്ക് ആശുപത്രിയില്‍ ചികിത്സയിലാണ്. പ്രതികളെ ഇന്ന് താമരശ്ശേരി കോടതിയില്‍ ഹാജരാക്കും.