ജയ്പൂര്‍: പീഡനത്തിനിരയായ പെണ്‍കുട്ടി നല്‍കിയ പരാതി പൊലിസ് അവഗണിച്ചു. 21 കാരിയായ കോളജ് വിദ്യാര്‍ഥിനിയെ ഒരുസംഘം ഭീഷണിപ്പെടുത്തി രണ്ടുവര്‍ഷം പീഡിപ്പിച്ചു. രാജസ്ഥാനിലെ ആല്‍വാറിലാണ് സംഭവം. മൂന്നുപേരെ പൊലിസ് അറസ്റ്റ് ചെയ്തു.
2019 മേയിലാണ് കോളേജ് വിദ്യാര്‍ഥിനിയായ യുവതി ആദ്യം പീഡനത്തിനിരയാകുന്നത്. പരീക്ഷ എഴുതാന്‍ പോകുമ്പോള്‍ യുവതിയെ വികാസ്, ഭുരു ജാട്ട് എന്നിവര്‍ തട്ടിക്കൊണ്ടുപോകുകയും മൂന്നുപേര്‍ ചേര്‍ന്ന് പീഡിപ്പിക്കുകയുമായിരുന്നു.

യുവതി മലാഖേര പൊലിസ് സ്റ്റേഷനില്‍ പരാതി നല്‍കിയെങ്കിലും കേസെടുക്കാന്‍ പൊലിസ് തയാറായില്ല. തുടര്‍ന്ന് യുവതിയുടെ വിഡിയോ പ്രചരിപ്പിക്കുമെന്ന് ഭീഷണിപ്പെടുത്തി മൂവരും രണ്ടുവര്‍ഷം പീഡനത്തിനിരയാക്കി. ഈവര്‍ഷം ജൂണ്‍ 25ന് ഗൗതം സെയ്‌നി എന്നയാള്‍ യുവതിയുടെ വിഡിയോ അയച്ചുകൊടുത്ത് തനിക്ക് വഴങ്ങിയില്ലെങ്കില്‍ കുടുംബാംഗങ്ങള്‍ക്ക് വിഡിയോ അയച്ചുകൊടുക്കുമെന്ന് ഭീഷണിപ്പെടുത്തി. യുവതി വഴങ്ങാതിരുന്നതോടെ ഇയാള്‍ വിഡിയോ സമൂഹമാധ്യമത്തില്‍ പോസ്റ്റ് ചെയ്തു.
ജൂണ്‍ 28ന് യുവതി മലാഖേര പൊലിസ് സ്റ്റേഷനിലും പൊലിസ് സൂപ്രണ്ടിനും പരാതി നല്‍കിയതോടെ പൊലിസ് മൂന്നുപേരെയും അറസ്റ്റ് ചെയ്യുകയായിരുന്നു. കേസിലെ നാലാമനെ ഉടന്‍ അറസ്റ്റ്‌ചെയ്യുമെന്ന് പോലിസ് അറിയിച്ചു. പൊലിസിന്റെ വീഴ്ചയും അന്വേഷിക്കുമെന്നും ഉത്തരവാദികള്‍ക്കെതിരേ നടപടി സ്വീകരിക്കുമെന്നും അല്‍വാര്‍ സര്‍ക്കിള്‍ ഓഫിസര്‍ അമിത് സിങ് വ്യക്തമാക്കി.