പയ്യോളി: കോട്ടക്കടവ് തീരത്ത് മണല്‍തിട്ട രൂപപ്പെടുന്നത് ഇല്ലാതാക്കാന്‍ അഴിമുഖത്തിനു തെക്കുഭാഗത്തു പുലിമുട്ട് നിര്‍മിക്കണമെന്ന ആവശ്യം ശക്തമാകുന്നു. കുറ്റ്യാടി പുഴയുടെ ഒഴുക്ക് തടസപ്പെടുന്ന വിധത്തിലാണു മണല്‍തിട്ട രൂപപ്പെടുന്നത്. അഴിമുഖത്തിനു വടക്കു ഭാഗത്തു നിര്‍മിച്ച പുലിമുട്ട് കാരണമാണ് കോട്ടക്കല്‍ തീരത്തു മണല്‍തിട്ട രൂപപ്പെടുന്നത്.
തെക്കുഭാഗത്ത് പുലിമുട്ട് നിര്‍മിച്ചാല്‍ മണല്‍ കൊളായിപ്പാലം ഭാഗത്തുള്ള തീരത്തു നിക്ഷേപിക്കപ്പെടും. ഇതു കൊളാവിപ്പാലത്ത് കടല്‍തീരം രൂപപ്പെടാനും ഇവിടത്തെ ആമ വളര്‍ത്തുകേന്ദ്രത്തില്‍ ആമകള്‍ക്കു മുട്ടയിടാന്‍ കടലില്‍ നിന്നു കയറിവരാനും സൗകര്യമാകും. അതിനുപുറമെ, കൊളാവിപ്പാലം തീരത്തെ കടല്‍ക്ഷോഭത്തിനു ശക്തി  കുറയുകയും ചെയ്യും.
കോട്ടക്കല്‍ തീരത്ത് പുലിമുട്ട് നിര്‍മിക്കണമെന്ന് ആവശ്യപ്പെട്ടു ജനകീയ തീരദേശ സംരക്ഷണ സമിതി രംഗത്തുവന്നിട്ടുണ്ട്.