ഐപിഎല്‍ രണ്ടാം മത്സരത്തില്‍ ഡല്‍ഹി ഇന്ന് പഞ്ചാബിനെ നേരിടുകയാണ്. എന്നാല്‍ മത്സരത്തിന് മറ്റൊരു സവിശേഷത കൂടിയുണ്ട്. നീണ്ട ഒന്നര വര്‍ഷത്തെ ഇടവേളയ്ക്ക് ശേഷം സൂപ്പര്‍ താരം ഋഷഭ് പന്ത് കളിക്കളത്തിലേക്ക് തിരിച്ചെത്തുകയാണ്. പഞ്ചാബിന്റെ ഹോംഗ്രൗണ്ടില്‍ നടക്കുന്ന മത്സരത്തില്‍ ടോസിനിടെ പന്ത് തിരിച്ചു വരവിനെക്കുറിച്ച് വാചാലനായി. 'എനിക്കിത് ശരിക്കും വൈകാരികമായ സമയമാണിത്. ഈ നിമിഷം ആസ്വദിക്കാന്‍ ഞാന്‍ ആഗ്രഹിക്കുന്നു. അധികമൊന്നും ആലോചിക്കുന്നില്ല. കഴിഞ്ഞ സീസണില്‍ ആശങ്കയില്ലെന്ന് ഞാന്‍ കരുതുന്നു. ശരിക്കും ആവേശകരമായ സമയങ്ങള്‍. ഞങ്ങള്‍ നന്നായി തയ്യാറെടുക്കുകയാണ്'. തിരിച്ചു വരവിനെക്കുറിച്ചും കളിയുടെ തയ്യാറെടുപ്പിനെക്കുറിച്ചും അദ്ദേഹം പറഞ്ഞു.

2022 ഡിസംബറില്‍ 30ന് നടന്ന കാറപകടത്തില്‍ ഗുരുതരമായ പരിക്കുകളേറ്റതിനെത്തുടര്‍ന്നാണ് 26 കാരനായ പന്ത് ക്രിക്കറ്റില്‍ നിന്ന് വിട്ട് നിന്നത്. പന്ത് തന്നെയാണ് അന്ന് വാഹനമോടിച്ചിരുന്നത്. കാല്‍മുട്ടിനും പാദങ്ങള്‍ക്കുമാണ് പരിക്കേറ്റത്.

അതിനുശേഷമുള്ള കാലയളവിലത്രയും പന്ത് പൂര്‍ണ്ണ വിശ്രമത്തിലായിരുന്നു. കഴിഞ്ഞ വര്‍ഷം പന്തിന്റെ അഭാവത്തില്‍ ഡേവിഡ് വാര്‍ണറാണ് ഡല്‍ഹിയെ നയിച്ചത്. ടൂര്‍ണമെന്റില്‍ വന്‍ പരാജയമായ ടീം സീസണില്‍ 9 സ്ഥാനത്താണ് അന്ന് ഫിനിഷ് ചെയ്തത്. ബംഗ്ലാദേശിനെതിരെയുള്ള ടെസ്റ്റ് പരമ്പരയ്ക്ക് ശേഷം ആദ്യമായി മത്സര ക്രിക്കറ്റിലേക്കുള്ള പന്തിന്റെ തിരിച്ചുവരവിനാണ് ഈ ഐപിഎല്‍ വേദിയാവുന്നത്. ഐപിഎല്ലിന് ശേഷം ടി20 ലോകകപ്പ് കാമ്പെയ്ന്‍ ആരംഭിക്കുന്നതിനാല്‍ പന്തിന്റെ ഫോം ടീം ഇന്ത്യക്കും നിര്‍ണ്ണായകമാണ്.