ജര്‍മന്‍ ഫുട്ബാള്‍ താരം റോബര്‍ട്ട് ബോവര്‍ ഇസ്‌ലാം സ്വീകരിച്ചു

ജര്‍മന്‍ ഫുട്ബാള്‍ താരം റോബര്‍ട്ട് ബോവര്‍ ഇസ്‌ലാം സ്വീകരിച്ചു. ഇന്‍സ്റ്റഗ്രാമിലൂടെയാണ് താരം ഇക്കാര്യം അറിയിച്ചത്. നിസ്‌ക്കരിക്കുന്ന ഫോട്ടവും താരം ഇന്‍സ്റ്റയില്‍ പോസ്റ്റ് ചെയ്തിട്ടുണ്ട്. ഇസ് ലാം സ്വീകരിക്കുന്നതിന് തനിക്ക് വഴികാട്ടിയായത് ഭാര്യയും കുടുംബവുമാണെന്നും അദ്ദേഹം കുറിച്ചു.

'ഇന്ന് എനിക്ക് സന്ദേശം അയക്കുന്ന എല്ലാവര്‍ക്കും വേണ്ടി, ഭാര്യയും അവരുടെ കുടുംബവുമാണ് ഇസ്‌ലാം മതം സ്വീകരിക്കുന്നതിന് വഴികാട്ടിയായത്. ഈ യാത്രയില്‍ എന്നെ സഹായിച്ചതിനും പ്രോത്സാഹിപ്പിച്ചതിനും നിങ്ങളോട് ഞാന്‍ കടപ്പെട്ടിരിക്കുന്നു' ബോവര്‍ ഇന്‍സ്റ്റഗ്രാമില്‍ കുറിച്ചു.

നിലവില്‍ സഊദി പ്രോ ലീഗ് ക്ലബായ അല്‍ തായി എഫ്.സിയുടെ താരമാണ് ഈ 28കാരന്‍. സീസണില്‍ ഒരു വര്‍ഷത്തെ കരാറിലാണ് താരം സഊദി ക്ലബിലെത്തുന്നത്.

2014 ഒക്ടോബര്‍ 31ന് എഫ്.സി ഇന്‍ഗോള്‍സ്റ്റാഡ് ക്ലബിലൂടെ താരം ബുണ്ടസ് ലീഗയില്‍ അരങ്ങേറ്റം കുറിച്ചു. 2016 ആഗസ്റ്റില്‍ വെര്‍ഡര്‍ ബ്രെമെനിലേക്കും വര്‍ഷാവസാനം വായ്പാടിസ്ഥാനത്തില്‍ എഫ്.സി ന്യൂറന്‍ബര്‍ഗിലേക്കും കൂടുമാറി. പിന്നാലെ റഷ്യന്‍ ക്ലബ് എഫ്.സി ആഴ്‌സണല്‍ തുലയിലേക്കും 2021ല്‍ ബെല്‍ജിയം ക്ലബ് സിന്റ്ട്രൂയിഡനിലേക്കും പോയി.

2015ല്‍ ന്യൂസിലന്‍ഡില്‍ നടന്ന ഫിഫ അണ്ടര്‍ 20 ലോകകപ്പിലും 2016 ഒളിമ്പിക്‌സിലും കളിച്ച ജര്‍മന്‍ ടീമില്‍ അംഗമായിരുന്നു.