തിരുവനന്തപുരം: വ്യാപാരികള്‍ ഉയര്‍ത്തുന്ന പ്രശ്‌നങ്ങള്‍ക്ക് പരിഹാരം കാണാനുള്ള ശ്രമങ്ങള്‍ തുടരുന്നുണ്ടെന്ന് ധനമന്ത്രി കെ.എന്‍ ബാലഗോപാല്‍. മൊറട്ടോറിയം സംബന്ധിച്ച കാര്യങ്ങളില്‍ ബാങ്കുകളുമായി ചര്‍ച്ച നടത്തും. വ്യാപാരികള്‍ക്ക് നോട്ടിസയയ്ക്കുന്നത് തുടരുമെങ്കിലും അവരെ ദ്രോഹിക്കുന്ന നടപടികളുണ്ടാകില്ലെന്നും നിയമസഭയില്‍ ധനാഭ്യര്‍ഥന ചര്‍ച്ചയ്ക്കുള്ള മറുപടിയില്‍ ധനമന്ത്രി പറഞ്ഞു.
ഒറ്റപ്പെട്ട സംഭവങ്ങളുടെ പേരില്‍ സഹകരണ പ്രസ്ഥാനത്തെയാകെ തള്ളിപ്പറയുന്ന രീതി ശരിയല്ല. തെറ്റു ചെയ്തവരെ ഒരു കാരണവശാലും സംരക്ഷിക്കില്ല. രണ്ടു ലക്ഷം കോടിയോളം രൂപ നിക്ഷേപമുള്ള സഹകരണ പ്രസ്ഥാനങ്ങളെ ലക്ഷ്യമിട്ട് ചില കഴുകന്‍മാര്‍ വട്ടംചുറ്റുന്നുണ്ട്. അവര്‍ക്കു സഹായകമായ നടപടികളുണ്ടാകരുത്.

പട്ടയത്തിനായുള്ള ഒന്നര ലക്ഷത്തിലേറെ അപേക്ഷകള്‍ തീര്‍പ്പാക്കാന്‍ സമയബന്ധിത നടപടി ഉറപ്പാക്കിയതായി റവന്യൂ മന്ത്രി കെ. രാജന്‍ പറഞ്ഞു. ഇതിനായി സര്‍ക്കാര്‍ ഉത്തരവുകളിലടക്കം ആവശ്യമായ ഭേദഗതി വരുത്തും. സംസ്ഥാനത്ത് ഏകീകൃത തണ്ടപ്പേര് കൊണ്ടുവരുന്നത് ആലോചിക്കുമെന്നും വില്ലേജ് ഓഫിസുകള്‍ കൂടുതല്‍ സ്മാര്‍ട്ടാക്കുമെന്നും അദ്ദേഹം പറഞ്ഞു.