കൊടുങ്ങല്ലൂര്‍: പ്രായപൂര്‍ത്തിയാകാത്ത ആള്‍ ഉള്‍പ്പടെ രണ്ട് പേര്‍ കഞ്ചാവുമായി പിടിയില്‍. എറണാകുളം ചെറായി വെള്ളേഴത്ത് രജിത്ത് (27), ചെറായി സ്വദേശിയായ പതിനേഴ് വയസുകാരന്‍ എന്നിവരാണ് തൃശൂര്‍ റൂറല്‍ എസ്.പിയുടെ കീഴിലുള്ള ആന്റി നാര്‍ക്കോട്ടിക് സ്‌ക്വാഡിന്റെ പിടിയിലായത്. ഇവരില്‍ നിന്നും പൊതികളായി സൂക്ഷിച്ചിരുന്ന കഞ്ചാവ് പിടിച്ചെടുത്തു. എടവിലങ്ങ് ഗവ.ഹയര്‍ സെക്കന്‍ഡറി സ്‌കൂള്‍ പരിസരത്ത് നിന്നുമാണ് രജിത്തിനെ പൊലിസ് അറസ്റ്റ് ചെയ്തത്. ഇയാളുടെ പക്കല്‍ നിന്നും അമ്പത് ഗ്രാം കഞ്ചാവ് കണ്ടെടുത്തു. രജിത്തില്‍ നിന്നും ലഭിച്ച വിവരമനുസരിച്ച് നടത്തിയ അന്വേഷണത്തിലാണ് പതിനേഴ് വയസുകാരനെ കൊടുങ്ങല്ലൂര്‍ വടക്കെ നടയില്‍ ഗവ. ഗേള്‍സ് ഹയര്‍ സെക്കന്‍ഡറി സ്‌കൂള്‍ പരിസരത്ത് നിന്നും കസ്റ്റഡിയിലെടുത്തത്. ഇയാളില്‍ നിന്നും മുപ്പത്തിയഞ്ച് ഗ്രാം കഞ്ചാവ് പിടിച്ചെടുത്തു. പിടിയിലായ ഇരുവരും ചെറായി കേന്ദ്രീകരിച്ചുള്ള കഞ്ചാവ് ലോബിയില്‍ പെട്ടവരാണെന്ന് പൊലിസ് പറഞ്ഞു. കൊടുങ്ങല്ലൂര്‍ മേഖലയിലേക്ക് ഏറിയ പങ്കും കഞ്ചാവ് എത്തുന്നത് ചെറായിയില്‍ നിന്നുമാണെന്നാണ് സൂചന. കഞ്ചാവ് വിതരണ ശൃംഖലയില്‍ ഉള്‍പ്പെട്ട മറ്റു ചിലരെ കുറിച്ചും പൊലിസിന് വിവരം ലഭിച്ചിട്ടുണ്ട്.