പട്‌ന: പരീക്ഷാഹാളിലേക്ക് എറിഞ്ഞ തുണ്ടുകടലാസ് പ്രണയ ലേഖനമാണെന്ന് കരുതി വിദ്യാര്‍ഥിയെ പെണ്‍കുട്ടിയുടെ സഹോദരങ്ങള്‍ കൊലപ്പെടുത്തി. ബിഹാറിലെ ബോജ്പൂരില്‍ കഴിഞ്ഞ ആഴ്ചയാണ് സംഭവം. യുവാവിന്റെ മൃതദേഹം കഷ്ണങ്ങളാക്കിയ നിലയില്‍ മഹാത്ബാനിയ ഹാള്‍ട് റെയില്‍വേ സ്റ്റേഷനു സമീപം പൊലിസ് കണ്ടെത്തി. സംഭവത്തില്‍ പെണ്‍കുട്ടിയുടെ സഹോദരന്‍ ഉള്‍പ്പെടെയുള്ളവരെ പൊലിസ് അറസ്റ്റ് ചെയ്തു.

കൊല്ലപ്പെട്ട വിദ്യാര്‍ഥി അര്‍ധ വാര്‍ഷിക പരീക്ഷയ്ക്കിടെ ആറാം ക്ലാസില്‍ പഠിക്കുന്ന തന്റെ സഹോദരിക്ക് കോപ്പിയടി കുറിപ്പ് എറിഞ്ഞു കൊടുത്തിരുന്നു. എന്നാല്‍ ഇത് മറ്റൊരു പെണ്‍കുട്ടിക്കാണ് ലഭിച്ചത്. പ്രണയലേഖനമെന്ന് തെറ്റിദ്ധരിച്ച ആ പെണ്‍കുട്ടി ഇക്കാര്യം സഹോദരനോട് പറഞ്ഞു. തുടര്‍ന്ന് വിദ്യാര്‍ഥിയെ കൊലപ്പെടുത്തി കൈയും കാലും മുറിച്ചുമാറ്റുകയായിരുന്നു.

തുടര്‍ന്ന് ഗ്രാമീണര്‍ പരാതിപ്പെട്ടതോടെയാണ് യുവാവിന്റെ മൃതദേഹത്തെക്കുറിച്ച് പൊലിസ് വിശദമായ അന്വേഷണം നടത്തിയത്. യുവാവ് ട്രെയിന്‍ തട്ടി മരിച്ചെന്ന് വരുത്തിതീര്‍ക്കാനായിരുന്നു പ്രതികളുടെ ശ്രമം. കൊല്ലപ്പെട്ട വിദ്യാര്‍ഥി പഠനത്തില്‍ മിടുക്കനായിരുന്നുവെന്ന് പൊലിസ് പറഞ്ഞു.

തിങ്കളാഴ്ചയാണ് ഗ്രാമത്തില്‍ നിന്നും ഒരു കൈപ്പത്തി കണ്ടെത്തിയത്. ഉടന്‍ പൊലീസ് സ്ഥലത്തെത്തി നടത്തിയ തെരച്ചിലിലാണ് മൃതദേഹത്തിന്റെ ബാക്കി ഭാഗം റെയില്‍വേ പാളത്തില്‍ നിന്ന് കണ്ടെത്തിയത്.