ന്യൂഡൽഹി: കർണാടകയിലെ വിദ്യാഭ്യാസ സ്ഥാപനങ്ങളിൽ സംസ്ഥാനത്തെ ബി.ജെ.പി സർക്കാർ ഹിജാബ് വിലക്കിയതിനെതിരായ സമരങ്ങൾക്ക് ഭീകരവാദ ബന്ധമാരോപിച്ച് വാർത്ത നൽകിയ ന്യൂസ് 18 ഇന്ത്യയ്ക്ക് അരലക്ഷം രൂപ പിഴചുമത്തി.

ന്യൂസ് ബ്രോഡ്കാസ്റ്റിങ്ങ് ആൻഡ് ഡിജിറ്റൽ സ്റ്റാൻഡേർഡ്സ് അതോറിറ്റി (എൻ.ബി.ഡി.എസ്.എ) ആണ് 50,000 നടപടി സ്വീകരിച്ചത്. ഹിജാബിനെ പിന്തുണയ്ക്കുന്നവരെ അൽഖ്വയ്ദയുടെയും അൽഖാഇദ നേതാവ് ഐമൻ സവാഹിരിയുടെയും അനുകൂലികളായി വിശേഷിപ്പിച്ച് വാർത്ത നൽകിയതിനെത്തുടർന്നാണ് നടപടി. വാർത്താ അവതാരകൻ അമൻ ചോപ്ര അനാദരവോടെ പെരുമാറിയെന്നും ധാർമികത പാലിച്ചില്ലെന്നും എൻ.ബി.ഡി.എസ്.എ ചൂണ്ടിക്കാട്ടി.

അവതാരകൻ റിപ്പോർട്ട് ചെയ്യുമ്പോൾ പാലിക്കേണ്ട മര്യാദകളും ബോംബെ ഹൈക്കോടതിയുടെ പ്രത്യേക നിർദേശങ്ങളും പാലിക്കുന്നതിൽ പരാജയപ്പെട്ടുവെന്ന് അതോറിറ്റി ചൂണ്ടിക്കാട്ടി. ചർച്ചയിൽ പങ്കെടുക്കുന്ന പാനലിസ്റ്റുകളുടെ കാര്യത്തിൽ സന്തുലിത നിലപാട് സ്വീകരിക്കണമെന്ന സുപ്രിംകോടതിയുടെ നിർദേശവും എൻ.ബി.ഡി.എസ്.എ ചാനലിനെ ഓർമിപ്പിച്ചു. ന്യൂസ് 18 അവതാരകൻ ചില പാനലിസ്റ്റുകൾ അതിര് ലംഘിച്ചപ്പോൾ അതിനെ തടഞ്ഞില്ല. ഇന്ത്യയിൽ നിലനിൽക്കുന്ന സാമുദായിക, മത സൗഹാർദത്തെ ബാധിക്കുന്ന തീവ്ര നിലപാടുകൾ പരസ്യമായി പറയാൻ പാനലിസ്റ്റുകൾക്ക് അവതാരകൻ അവസരം നൽകിയെന്നും എൻ.ബി.ഡി.എസ്.എ പത്രക്കുറിപ്പിൽ പറഞ്ഞു.

സവാഹിരി ഗാംഗ് മെംബർ, സവാഹിരിയുടെ അംബാസഡർ, സവാഹിരിയാണ് നിങ്ങളുടെ ദൈവം, നിങ്ങൾ അയാളുടെ ആരാധകനാണ് തുടങ്ങിയ പരാമർശങ്ങൾ അംഗീകരിക്കാനാവില്ല. ഹിജാബ് വിവാദം ആസൂത്രണം ചെയ്തത് അൽഖാഇദ, ഹിജാബിനു പിന്നിൽ അൽ സവാഹിരി, അൽഖാഇദ ഗാംഗ് എക്സ്പോസ്ഡ്, ഹിജാബ് കാ ഫത് വ പോസ്റ്റർ, നിക് ല അൽഖാഇദ തുടങ്ങിയ ഹാഷ് ടാഗുകളും കാർഡുകളും ചാനൽ സംപ്രേഷണം ചെയ്തതിനെയും എൻ.ബി.ഡി.എസ്.എ വിമർശിച്ചു.

NBDSA impose?50,000 rs fine on News18 for labelling pro-Hijab panellists Al Qaeda gang