വൈത്തിരി: അനധികൃതമായി റവന്യൂഭൂമി കൈയേറി നിര്‍മാണം നടത്തുന്നതായി പരാതി. ചുണ്ടേല്‍ വില്ലേജില്‍പ്പെട്ട കുന്നത്ത് പാലം-കണ്ണാടിച്ചോല റോഡരികിലെ പുഴയോരത്താണ് അനധികൃത നിര്‍മാണം നടക്കുന്നത്.
പുഴ പുറമ്പോക്ക് കൈയേറി മണ്ണിട്ട് നികത്തിയാണ് നിര്‍മാണം നടക്കുന്നത്. ഈറ്റക്കാടുകള്‍ വെട്ടിമാറ്റി തെങ്ങിന്‍ തടികളും പലകകളും ഉപയോഗിച്ചാണ് പുറംമ്പോക്ക് നികത്തുന്നത്. ജനറേറ്ററുകളുടെ സഹായത്തോടെ ഇരുമ്പ് കട്ടകള്‍ കൊണ്ട് അടിച്ച് താഴ്ത്തിയാണ് തെങ്ങിന്‍ തടികള്‍ സ്ഥാപിക്കുന്നത്. അനധികൃത നിര്‍മാണത്തിനെതിരേ വൈത്തിരി പരിസ്ഥിതിസമിതി പ്രവര്‍ത്തകര്‍ പ്രതിഷേധവുമായി രംഗത്തെത്തിയിട്ടുണ്ട്. പ്രദേശത്തെ അനധികൃത നിര്‍മാണ പ്രവര്‍ത്തനങ്ങള്‍ക്കെതിരേ ശക്തമായ നടപടി സ്വീകരിക്കണമെന്ന് വൈത്തിരി പരിസ്ഥിതി സമിതി പ്രവര്‍ത്തകര്‍ റവന്യു, പഞ്ചായത്ത് അധികൃതരോടാവശ്യപ്പെട്ടു. സമിതി പ്രസിഡന്റ് എം.വി ബാബു, ജോ: സെക്രട്ടറി: പി.കെ രാജന്‍, ജ്യോതി ദാസ്, അനില്‍കുമാര്‍, അനൂപ് കുമാര്‍ തുടങ്ങിയവരുടെ നേതൃത്വത്തിലാണ് നിവേദനം സമര്‍പ്പിച്ചത്.