ടെല്‍ അവീവ്: ഹമാസുമായുള്ള സമാധാന കരാറിനെ തുടര്‍ന്ന് മോചിപ്പിക്കപ്പെട്ട ഇസ്‌റാഈലി ബന്ദികളെ ആക്ഷേപിച്ച് പ്രധാനമന്ത്രി ബെന്യാമിന്‍ നെതന്യാഹുവിന്റെ ഭാര്യ സാറ നെതന്യാഹു. ഇസ്‌റാഈലി പാര്‍ലമെന്റ് അംഗവുമായി നടത്തിയ സ്വകാര്യ സംഭാഷണത്തിനിടെയാണ് സാറയുടെ വിവാദ പരാമര്‍ശം. യുദ്ധം തുടരുന്നതിനിടെ ഏറെ ബുദ്ധിമുട്ടി മോചിപ്പിച്ച ബന്ദികളിലാെരാളും തനിക്കോ തന്റെ ഭര്‍ത്താവിനോ നന്ദി പറഞ്ഞില്ലെന്നാണ് സാറ കുറ്റപ്പെടുത്തിയത്. നെസെറ്റ് അംഗത്തെ അഭിസംബോധന ചെയ്ത്, 'എത്ര ബന്ദികളെയാണ് നാം തിരിച്ചെത്തിച്ചത്? അതിന് അവര്‍ നന്ദിപോലും കാണിച്ചില്ല' എന്നായിരുന്നു അവരുടെ വാക്കുകള്‍.

വിഷയം വിവിധ മാധ്യമങ്ങളടക്കം റിപ്പോര്‍ട്ട് ചെയ്തതോടെ വിവാദമായി. സാറയുടെ വാക്കുകളോട് രൂക്ഷമായി പ്രതികരിച്ച് ബന്ദികള്‍ തന്നെ രംഗത്തെത്തി. 'ഇത്തവണ ക്ഷമിക്കണം, ഞാന്‍ ബന്ദിയാക്കപ്പെട്ടിരിക്കുകയായിരുന്നു'  18കാരനായ ലിയാം ഒര്‍ പരിഹസിച്ചു. സമാന പ്രതികരണവുമായി മോചിപ്പിക്കപ്പെട്ട മറ്റൊരു ബന്ദി യിഗില്‍ യാകോവും രംഗത്തെത്തി. 'ഇത്തവണ ബന്ദിയാക്കപ്പെട്ടിരിക്കുകയായിരുന്നു, അടുത്ത തവണ ഗസ്സയിലേക്ക് ടൂറിന് പോകുമ്പോള്‍ ആവാം' എന്നായിരുന്നു അദ്ദേഹത്തിന്റെ പരിഹാസം.

ഹമാസുമായുള്ള സംഘര്‍ഷം അഞ്ചുമാസം പിന്നിട്ടിട്ടും 100ലധികം ബന്ദികളെ ഇനിയും വിട്ടുകിട്ടാത്ത സാഹചര്യത്തില്‍ ഇസ്‌റാഈലില്‍ നെതന്യാഹുവിനും സര്‍ക്കാരിനുമെതിരേ ജനരോഷം ശക്തമാണ്. ഇതിനിടെയാണ് സാറ നെതന്യാഹുവിന്റെ ആക്ഷേപ വാക്കുകള്‍. സാറയുടേത് തീര്‍ത്തും സ്വകാര്യ സംഭാഷണമായിരുന്നുവെന്നാണ് നെതന്യാഹുവിന്റെ ഓഫിസ് വിഷയത്തില്‍ പ്രതികരിച്ചത്.