പാരിസ്: ഫ്രഞ്ച് താരം എംബാപ്പെയെ സ്വന്തമാക്കാനുള്ള ശ്രമങ്ങള്‍ റയല്‍ മാഡ്രിഡ് ഔദ്യോഗികമായി ആരംഭിച്ചു. 

എംബാപ്പെക്കായി റയല്‍ മാഡ്രിഡ് 160 മില്യണ്‍ യൂറോയുടെ ബിഡ് പി.എസ്.ജിക്ക് സമര്‍പ്പിച്ചതായി ഫബ്രിസിയോ റൊമാനോ റിപ്പോര്‍ട്ട് ചെയ്യുന്നു. എംബാപ്പെ റയല്‍ മാഡ്രിഡിലേക്ക് പോകാന്‍ തയ്യാറാണെങ്കിലും പി .എസ്.ജി മാനേജ്‌മെന്റ് താരത്തെ വില്‍ക്കാന്‍ ഒരുക്കമല്ല. പി.എസ്.ജി ഇതുവരെ റയല്‍ മാഡ്രിഡിന്റെ ബിഡിനോട് പ്രതികരിച്ചിട്ടുമില്ല. പി.എസ്. ജി പ്രസിഡന്റ് നാസര്‍ അല്‍ ഖലീഫി എംബാപ്പെയെ ഒരു കാരണവശാലും വില്‍ക്കില്ലെന്ന് നേരത്തെ വ്യക്തമാക്കിയിരുന്നു. എന്നാല്‍ എംബാപ്പെ പി.എസ്.ജിയില്‍ കരാര്‍ പുതുക്കാത്തത് ക്ലബിന് ആശങ്ക നല്‍കുന്നു@ണ്ട്. എംബാപ്പെക്ക് പി.എസ്. ജി ഓഫര്‍ ചെയ്ത മൂന്ന് പുതിയ കരാറുകളും താരം നിരസിച്ചിരുന്നു. മെസ്സി, എംബാപ്പെ, നെയ്മര്‍ സഖ്യത്തെ ഒരുമിച്ച് കളത്തില്‍ കാണാമെന്ന ഫുട്‌ബോള്‍ ആരാധകരുടെ ആഗ്രഹത്തിനാണ് റയല്‍ മാഡ്രിഡിന്റെ ശ്രമങ്ങള്‍ തിരിച്ചടിയാകുന്നത്. എംബാപ്പെ നേരത്തെ തന്നെ റയലിലേക്ക് പോകാന്‍ ശ്രമങ്ങള്‍ നടത്തിയിരുന്നു. 

എംബാപ്പെ ക്ലബ് വിടുകയാണെങ്കില്‍ ട്രാന്‍സ്ഫര്‍ വിന്‍ഡോയുടെ അവസാന നിമിഷങ്ങളില്‍ ക്രിസ്റ്റ്യാനോ റൊണാള്‍ഡോയെ ടീമിലെത്തിക്കാന്‍ പി.എസ്.ജി ശ്രമിക്കുമെന്ന തരത്തിലും വാര്‍ത്ത പരക്കുന്നുണ്ട്.