ഇന്ത്യന്‍ നാവികസേനയുടെ കുന്തമുനയാകാന്‍ പോകുന്ന ഐ.എന്‍.എസ് വിക്രാന്ത് എന്ന തദ്ദേശീയ നിര്‍മിത വിമാന വാഹിനിക്കപ്പല്‍ രാജ്യത്തിന് സമ്മാനിക്കുന്നത് അഭിമാനത്തിന്റെ സുവര്‍ണചരിതം. വിമാന വാഹിനിക്കപ്പല്‍ നിര്‍മാണത്തില്‍ ഇന്ത്യ സ്വാശ്രയത്വം കൈവരിച്ചുവെന്നതാണ് വിക്രാന്തിന്റെ നിര്‍മാണ പൂര്‍ത്തീകരണത്തിലൂടെയുണ്ടായ പ്രധാന നേട്ടം. രൂപകല്‍പന മുതല്‍ നിര്‍മാണ പൂര്‍ത്തീകരണം വരെയും കടല്‍ പരിശീലനവുമുള്‍പ്പെടെ വിവിധ ഘട്ടങ്ങള്‍ വിക്രാന്ത് പൂര്‍ത്തീകരിച്ചു. നാവിക സേനയോടൊപ്പം കൊച്ചി കപ്പല്‍ശാലയെന്ന പൊതുമേഖനാ സ്ഥാപനത്തിനും കീര്‍ത്തിമുദ്ര ചാര്‍ത്തുകയാണ് കപ്പലിന്റെ നിര്‍മാണം. നിര്‍മാണത്തിനായി മുതല്‍ മുടക്കിയ 20,000 കോടിയില്‍ നല്ലൊരു പങ്കും ചെറുകിട, ഇടത്തരം വ്യവസായ സംരംഭകരിലേക്ക് എത്തിയെന്ന പ്രത്യേകതയും വിക്രാന്തിനുണ്ട്. ഇതോടെ കപ്പലിനായി ചെലവിട്ട തുക രാജ്യത്തിന്റെ സമ്പദ്‌വ്യവസ്ഥയിലേക്ക് തന്നെ തിരികെയെത്തി. ആയിരങ്ങള്‍ക്ക് തൊഴിലവസരവും ഇതിലൂടെ സൃഷ്ടിക്കപ്പെട്ടു. നിര്‍മാണത്തിനായി ഉപയോഗിച്ച 76 ശതമാനം വസ്തുക്കളും ഇന്ത്യന്‍ നിര്‍മിതമാണെന്ന പ്രത്യേകതയുമുണ്ട്.