ദമാം: സഊദിക്ക് നേരെ വീണ്ടും യമനിലെ ഹൂതി വിഭാഗത്തിന്റെ കൂട്ട മിസൈൽ, ഡ്രോൺ ആക്രമണങ്ങൾ. ആക്രമണത്തിൽ രണ്ട് കുട്ടികൾക്ക് പരിക്ക് ഏറ്റതായും വീടുകൾക്ക് നാശ നഷ്ടം സംഭവിച്ചതായും അറബ് സഖ്യ സേന അറിയിച്ചു. കിഴക്കൻ സഊദിയിലെ വാണിജ്യ നഗരിയായ ദമാമിനെ ലക്ഷ്യമാക്കിയതിയെ മിസൈൽ അവശിഷ്ടം പതിച്ചാണ് പരിക്ക്. സ്വദേശി കുട്ടികളായ ഒരു ആൺകുട്ടിക്കും പെൺകുട്ടിക്കുമാണ് പരിക്ക് പറ്റിയതെന്ന് അറബ് സഖ്യ സേന വക്താവ് കേണൽ തുർക്കി അൽ മാലികി അറിയിച്ചു.

ശനിയാഴ്ച രാത്രി 09:30 ഓടെയാണ് കിഴക്കൻ നഗരിക്കും നജ്റാനിനും നേരെ മിസൈൽ കുതിച്ചെത്തിയത്. എന്നാൽ, രണ്ടും ആകാശത്തു വെച്ച് തന്നെ തകർത്തതായി സഖ്യ സേന അറിയിച്ചിരുന്നു. ദമാമിൽ ഇതിന്റെ അവശിഷ്ടങ്ങൾ പതിച്ചാണ് കുട്ടികൾക്ക് പരിക്കെറ്റത്. പതിനാല് വീടുകൾക്ക് ചെറിയ കേടുപാടുകൾ പറ്റിയതായും സഖ്യ സേന അറിയിച്ചു. കിഴക്കൻ പ്രവിശ്യ, ജിസാൻ, നജ്റാൻ എന്നിവ ലക്ഷ്യമാക്കി മൂന്ന് ബാലിസ്റ്റിക് മിസൈലുകളും മൂന്ന് ആയുധ ഡ്രോണുകളുമാണ് കുതിച്ചെത്തിയതെന്നും അറബ് സഖ്യ സേന അറിയിച്ചു.

ഒട്ടനവധി വ്യവസായങ്ങളും എണ്ണ കിണറുകളും ശുദ്ധീകരണ കേന്ദ്രങ്ങളും വ്യാപകമായുള്ള കിഴക്കൻ മേഖല ലക്ഷ്യമാക്കി നേരത്തെയും ആക്രമണങ്ങൾ നടന്നിരുന്നു. സിവിലിയന്മാരെയും സിവിലിയൻ വസ്തുക്കളെയും ലക്ഷ്യമിടാനുള്ള ഹൂതി ശ്രമങ്ങൾ ശത്രുതാപരവും പ്രാകൃതവുമാണെന്നും സിവിലിയൻമാരെ സംരക്ഷിക്കാൻ സഖ്യം കർശന നടപടികൾ കൈക്കൊള്ളുന്നുവെന്നും സഖ്യസേന പറഞ്ഞു.

വെള്ളിയാഴ്ച രാവിലെയും വൈകുന്നേരവും ആയുധ ഡ്രോണുകൾ രാജ്യത്തെ ലക്ഷ്യമാക്കി എത്തിയിരുന്നു. ഏതാനും ദിവസങ്ങളായി തുടർച്ചയായി സഊദി കേന്ദ്രങ്ങൾ ലക്ഷ്യമാക്കി ഹൂതികൾ ആയുധങ്ങൾ അയക്കുകയാണ് കഴിഞ്ഞയാഴ്ച അബഹ അന്താരാഷ്ട്ര വിമാനത്താവളം ലക്ഷ്യമാക്കിയും ആക്രമണങ്ങൾ നടന്നിരുന്നു.