മുസാഫര്‍ നഗര്‍: ബിജെപിക്കെതിരേ ശക്തമായ നീക്കത്തിനൊരുങ്ങി കര്‍ഷകര്‍.
മോദി എല്ലാം വിറ്റുതുലയ്ക്കുകയാണെന്നും മോദിക്കുവേണ്ടി മാത്രമാകും പ്രചാരണമെന്നും വൈദ്യുതി, വെള്ളം തുടങ്ങി എല്ലാം വില്‍ക്കുകയാണ് മോദിയെന്നും ഇത് ജനങ്ങളോട് പറയുന്നതില്‍ തെറ്റുണ്ടോയെന്നും മഹാപഞ്ചായത്തിനിടെ കര്‍ഷക നേതാവ് ചോദിച്ചു.

മിഷന്‍ ഉത്തര്‍ പ്രദേശ് -ഉത്തരാഖണ്ഡ് എന്ന പേരിലാണ് മുസഫര്‍ നഗറില്‍ മഹാപഞ്ചായത്ത് നടത്തിയത്. അടുത്ത വര്‍ഷം ഉത്തര്‍പ്രദേശില്‍ നടക്കുന്ന സംസ്ഥാന തെരഞ്ഞെടുപ്പില്‍ ബിജെപിക്കെതിരേ പ്രചാരണം നടത്തുമെന്നും കര്‍ഷകര്‍. മോദിയുടെ മണ്ഡലത്തിലും മഹാപഞ്ചായത്ത് സംഘടിപ്പിക്കും.

ബിജെപി ഭരിക്കുന്ന ഉത്തര്‍പ്രദേശിലും ഉത്തരാഖണ്ഡിലും അടുത്ത വര്‍ഷമാദ്യത്തിലാണ് തെരഞ്ഞെടുപ്പ് നടക്കുന്നത്. ഈ സംസ്ഥാനങ്ങളില്‍ ബിജെപിക്കെതിരേ പ്രചാരണം നടത്താനാണ് കര്‍ഷകനീക്കം. 40 കര്‍ഷസംഘടനകളുടെ കൂട്ടായ്മയായ സംയുക്ത കിസാന്‍ മോര്‍ച്ചയാണ് മഹാപഞ്ചായത്ത് സംഘടിപ്പിച്ചത്. സര്‍ക്കാര്‍ ക്ഷണിച്ചാല്‍ ചര്‍ച്ചയ്ക്കു പോകും. ആവശ്യം നേടുംവര സമരം ചെയ്യുമെന്നും ടിക്കായത്ത് വ്യക്തമാക്കി.സമ്മേളനവേദിയിലും നഗരത്തിലും 8,000ത്തോളം പൊലീസിനെ യുപി സര്‍ക്കാര്‍ വിന്യസിച്ചിട്ടുണ്ട്.

ഈ മാസം 27ന് ഭാരത് ബന്ദ്

കര്‍ഷകനിയമങ്ങളില്‍ രാജ്യവ്യാപകമായി പ്രതിഷേധം കടുപ്പിക്കുന്നതിന്റെ ഭാഗമായി ഈ മാസം 27ന് ഭാരത് ബന്ദ് സംഘടിപ്പിക്കും. വരുംദിവസങ്ങളില്‍ രാജ്യത്തുടനീളം കര്‍ഷകസംഗമങ്ങള്‍ നടത്തുമെന്ന് രാകേഷ് ടികായത്ത് അറിയിച്ചു.

രാജ്യം വിറ്റുതുലയ്ക്കാനുള്ള നീക്കം തടയണം. കര്‍ഷകരെയും രാജ്യത്തെയും രക്ഷിക്കണം. ബിസിനസ് സംരംഭങ്ങളും തൊഴിലാളികളും യുവാക്കളുമെല്ലാം സംരക്ഷിക്കപ്പെടണമെന്നും ഇതാണ് കര്‍ഷകറാലിയുടെ ലക്ഷ്യമെന്നും രാകേഷ് ടികായത്ത് പറഞ്ഞു.