HOME
DETAILS

ഞായര്‍ പൂട്ടില്ല; ടി.പി.ആര്‍ കുറയുന്നു; കൊവിഡ് കേസുകളില്‍ കാര്യമായ വര്‍ധനയില്ല

  
backup
September 08 2021 | 04:09 AM

%e0%b4%9e%e0%b4%be%e0%b4%af%e0%b4%b0%e0%b5%8d%e2%80%8d-%e0%b4%aa%e0%b5%82%e0%b4%9f%e0%b5%8d%e0%b4%9f%e0%b4%bf%e0%b4%b2%e0%b5%8d%e0%b4%b2-%e0%b4%9f%e0%b4%bf-%e0%b4%aa%e0%b4%bf-%e0%b4%86%e0%b4%b0

 


സ്വന്തം ലേഖകന്‍
തിരുവനന്തപുരം: സംസ്ഥാനത്ത് കൊവിഡ് വ്യാപനം കുറഞ്ഞതോടെ നിയന്ത്രണങ്ങളില്‍ ഇളവ്. ഞായറാഴ്ചകളിലെ ലോക്ക്ഡൗണും രാത്രി 10 മുതല്‍ രാവിലെ ആറുവരെ ഏര്‍പ്പെടുത്തിയ കര്‍ഫ്യൂവും പിന്‍വലിക്കാന്‍ ഇന്നലെ മുഖ്യമന്ത്രിയുടെ നേതൃത്വത്തില്‍ ചേര്‍ന്ന അവലോകന യോഗത്തില്‍ തീരുമാനം.


കഴിഞ്ഞ ആഴ്ചയെ അപേക്ഷിച്ച് ഈ ആഴ്ച കൊവിഡ് കേസുകളില്‍ കാര്യമായി വര്‍ധനയുണ്ടായില്ലെന്ന് യോഗം വിലയിരുത്തി.
ദശാംശം ആറ് ശതമാനം മാത്രമാണ് ഈയാഴ്ചത്തെ വര്‍ധന. കഴിഞ്ഞ മാസം 24 മുതല്‍ 30 വരെയുള്ള ആഴ്ചയില്‍ 18.49 ശതമാനം ആയിരുന്നു ടി.പി.ആര്‍. അത് 31 മുതല്‍ ഈ മാസം ആറു വരെയുള്ള ആഴ്ചയില്‍ 17.91 ശതമാനം ആയി കുറഞ്ഞു.


കൂടുതല്‍ ജാഗ്രത തുടര്‍ന്നാല്‍ ഇനിയും കേസുകള്‍ കുറച്ചുകൊണ്ടുവരാന്‍ സാധിക്കുമെന്ന് യോഗം വിലയിരുത്തിയതായി മുഖ്യമന്ത്രി പിണറായി വിജയന്‍ വാര്‍ത്താസമ്മേളനത്തില്‍ അറിയിച്ചു.
അതിതീവ്ര വ്യാപനശേഷിയുള്ള ഡെല്‍റ്റ വൈറസ് നിലനില്‍ക്കുന്നതിനാല്‍ എല്ലാവരും തുടര്‍ന്നും ശ്രദ്ധിക്കേണ്ടതാണ്. ആരില്‍ നിന്നും ആരിലേക്കും രോഗം ഉണ്ടാകുന്ന അവസ്ഥയാണ് സംസ്ഥാനത്ത്.
എല്ലാവരും മാര്‍ഗനിര്‍ദേശങ്ങള്‍ കൃത്യമായി പാലിക്കണമെന്നും മുഖ്യമന്ത്രി പറഞ്ഞു.


തിങ്കളാഴ്ച വരെയുള്ള കണക്കനുസരിച്ച് 2,38,782 കൊവിഡ് കേസുകളില്‍ 12.82 ശതമാനം പേര്‍ മാത്രമാണ് ആശുപത്രികളിലോ ഫീല്‍ഡ് ആശുപത്രികളിലോ ചികിത്സയിലുള്ളത്.
ഈ ശതമാനം ഏറെക്കുറെ സ്ഥിരമായി തുടരുന്നുമുണ്ട്. ഇത് സൂചിപ്പിക്കുന്നത് രോഗബാധ ഉണ്ടാവുന്ന വ്യക്തികള്‍ക്ക് കൃത്യമായ പരിചരണവും പിന്തുണയും നല്‍കുന്നതുകൊണ്ട് രോഗപ്പകര്‍ച്ചയോ രോഗതീവ്രതയോ ആശങ്കാജനകമായ അളവില്‍ വര്‍ധിക്കുന്നില്ല എന്നാണ്.


എന്നാല്‍ ലക്ഷണങ്ങളുണ്ടായിട്ടും ഭൂരിഭാഗം രോഗികളും ആശുപത്രിയില്‍ വൈകി എത്തുന്നതും ശ്രദ്ധയില്‍പെട്ടിട്ടുണ്ട്.
കൊവിഡ് ബാധ സ്ഥിരീകരിച്ച എല്ലാവരെയും, പ്രത്യേകിച്ച് അനുബന്ധ രോഗങ്ങള്‍ ഉള്ളവരെ ഉടന്‍ ആശുപത്രിയില്‍ പ്രവേശിപ്പിക്കണമെന്നും മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."