ന്യൂഡല്‍ഹി: മികച്ച റോഡുകള്‍ പോലെയുള്ള നല്ല സേവനങ്ങള്‍ വേണമെങ്കില്‍ ആളുകള്‍ പണം മുടക്കേണ്ടി വരുമെന്ന് കേന്ദ്ര മന്ത്രി നിതിന്‍ ഗഡ്കരി.

'നിങ്ങള്‍ക്ക് എയര്‍ കണ്ടീഷന്‍ സൗകര്യമുള്ള ഹാള്‍ വേണമെങ്കില്‍ പണം നല്‍കേണ്ടി വരും. സൗജന്യമായി നടത്തേണ്‍വര്‍ വല്ല മൈതാനത്തും പരിപാടി നടത്തേണ്ടി വരും' ദേശീയപാതകളിലെ ടോള്‍ ചാര്‍ജുകളെക്കുറിച്ചുള്ള ചോദ്യങ്ങള്‍ക്ക് ഇതായിരുന്നു മന്ത്രിയുടെ മറുപടി.

എക്‌സ്പ്രസ് ഹൈവേകളിലെ ടോള്‍ ചാര്‍ജുകള്‍ യാത്ര ചെലവേറിയതാക്കുമോ എന്നായിരുന്നു മാധ്യമപ്രവര്‍ത്തകരുടെ ചോദ്യം. ഡല്‍ഹി മുംബൈ എക്‌സ്പ്രസ് വേയുടെ നിര്‍മാണം നടക്കുന്ന ഹരിയാനയിലെ സോഹ്‌ന സന്ദര്‍ശനത്തിനിടെയായിരുന്നു പ്രതികരണം.

'ഗുണമേന്മയുള്ള എക്‌സ്പ്രസ് വേകള്‍ യാത്രാ സമയവും യാത്രകള്‍ക്കുള്ള ഇന്ധനച്ചെലവും ഗണ്യമായി കുറക്കുമെന്ന് ഗഡ്കരി പറഞ്ഞു. ഡല്‍ഹി മുംബൈ എക്‌സ്പ്രസ് വേ യാത്രാ സമയം 12 മണിക്കൂറായി കുറക്കും. ഡല്‍ഹിയില്‍ നിന്ന് ഒരു ട്രക്കിന് മുംബൈയിലെത്താന്‍ 48 മണിക്കൂര്‍ എടുക്കും. എന്നാല്‍ അതിവേഗ പാതയില്‍ 18 മണിക്കൂര്‍ മാത്രമേ എടുക്കൂ. അതിനാല്‍, ഒരു ട്രക്കിന് കൂടുതല്‍ ട്രിപ്പുകള്‍ പോകാന്‍ കഴിയും, അത് കൂടുതല്‍ ബിസിനസ് നടക്കുന്നതിലേക്ക് നയിക്കും.' നിതിന്‍ ഗഡ്കരി പറഞ്ഞു.