ന്യൂഡല്‍ഹി: കൊവിഡ് ബാധിച്ച് മരിച്ചവരുടെ കുടുംബങ്ങള്‍ക്ക് സംസ്ഥാന ദുരന്ത നിവാരണ ഫണ്ടില്‍ നിന്ന് 50,000 രൂപ വീതം നഷ്ടപരിഹാരം നല്‍കും. ഇതു സംബന്ധിച്ച് ദേശീയ ദുരന്ത നിവാരണ അതോറിറ്റി മാര്‍ഗരേഖ തയാറാക്കിയതായി കേന്ദ്രസര്‍ക്കാര്‍ സുപ്രിംകോടതിയെ അറിയിച്ചു.
കൊവിഡ് ദുരിതാശ്വാസ പ്രവര്‍ത്തനത്തിനിടയിലും കൊവിഡിനെ നേരിടാനുള്ള പ്രവര്‍ത്തനങ്ങള്‍ക്കിടയിലും മരിച്ചവരുടെ ബന്ധുക്കള്‍ക്കും നഷ്ടപരിഹാരം നല്‍കും.
ഭാവിയില്‍ ഉണ്ടായേക്കാവുന്ന കൊവിഡ് മരണങ്ങള്‍ക്കും ഈ മാര്‍ഗരേഖ പ്രകാരം നഷ്ടപരിഹാരം നല്‍കും. മരണകാരണം കൊവിഡാണെന്ന് സര്‍ട്ടിഫിക്കറ്റില്‍ രേഖപ്പെടുത്തിയ കേസുകള്‍ക്ക് മാത്രമായിരിക്കും സഹായം. കൊവിഡ് സ്ഥിരീകരിച്ച് 30 ദിവസത്തിനുള്ളില്‍ മരിച്ചാലാണ് കൊവിഡ് മരണമായി കണക്കാക്കുക.

സംസ്ഥാന അധികൃതര്‍ തയാറാക്കിയ ഫോമിലാണ് അപേക്ഷിക്കേണ്ടത്. അപേക്ഷ ജില്ലാ ദുരന്ത നിവാരണ അതോറിറ്റി പരിശോധിക്കും.
അപേക്ഷ ലഭിച്ച് 30 ദിവസത്തിനുള്ളില്‍ തുക നല്‍കണമെന്ന് മാര്‍ഗരേഖയില്‍ വ്യക്തമാക്കിയിട്ടുണ്ട്. മരണ സര്‍ട്ടിഫിക്കറ്റ് സംബന്ധിച്ച് പരാതിയുണ്ടെങ്കില്‍ ജില്ലാതല സമിതി പരിശോധിക്കും.
മരണ സര്‍ട്ടിഫിക്കറ്റ് ഭേദഗതി ചെയ്ത് നല്‍കുന്നത് അടക്കമുള്ള പരിഹാര നടപടികളും സമിതി നിര്‍ദേശിക്കും.
സാമ്പത്തിക സഹായം ആധാറുമായി ബന്ധിപ്പിച്ചിട്ടുള്ള ബാങ്ക് അക്കൗണ്ട് വഴിയായിരിക്കും നല്‍കുകയെന്നും കേന്ദ്രം അറിയിച്ചു